Жамоат хавфсизлиги департаментида ёзги таътил даврида болалар хавфсизлигини таъминлаш чоралари муҳокама қилинди
2026-06-07 11:10:00 / Янгиликлар
Ички ишлар вазирининг 1-ўринбосари, Жамоат хавфсизлиги департаменти бошлиғи генерал-майор Рустам Джураев бошчилигида болалар соғломлаштириш оромгоҳларини ёзги таътил мавсуми бошланиши ва болаларни қабул қилишга тайёрлаш масалаларига бағишланган тезкор видеоселектор йиғилиши бўлиб ўтди.
Йиғилишда ИИВ Жамоат хавфсизлиги департаменти ва унинг ҳудудий бўлинмаларидаги ҳуқуқбузарликлар профилактикаси жамоат тартибини сақлаш, йўл ҳаракати хавфсизлиги хизматлари раҳбарлари ва ўринбосарлари, шунингдек Қўриқлаш департаменти масъул ходимлари ҳамда вояга етмаганлар хавфсизлигини таъминлашга масъул бўлган хизматлар ходимлари иштирок этди.
Вазирнинг 1-ўринбосари ёзги таътил даврида вояга етмаганлар хавфсизлигини комплекс таъминлаш, соғломлаштириш оромгоҳларида тайёргарлик ишларини ўз вақтида якунлаш ҳамда жойларда профилактик ишларни кучайтириш зарурлигига алоҳида эътибор қаратди.
У болаларни ташишда хавфсизлик қоидаларига қатъий риоя этиш, автобус колонналарига ҳамроҳликни тўғри ташкил этиш, шунингдек фойдаланилаётган транспорт воситаларининг техник ҳолатини доимий назорат қилиш муҳимлигини таъкидлади.
Шунингдек, оромгоҳлар ва уларга туташ ҳудудларда жамоат тартибини сақлашда идоралараро ҳамкорликни кучайтириш зарурлиги алоҳида қайд этилди.
Шу муносабат билан «Ғамхўрлик–2026» республика ишчи гуруҳи, тезкор штаб фаолияти самарадорлигини ошириш бўйича аниқ вазифалар қўйилди.
Жорий йилда республика бўйича 180 дан зиёд стационар соғломлаштириш оромгоҳларида 157 мингдан ортиқ болаларнинг дам олиши ташкил этилиши режалаштирилгани қайд этилди.
Ҳозирги кунда оромгоҳлар фаолияти босқичма-босқич йўлга қўйилиб, 113 та оромгоҳ ишга туширилган ва уларга 19 мингга яқин бола қабул қилинган.
Болаларни дам олиш жойларига хавфсиз етказиш ва уюшган колонналарга ҳамроҳлик қилиш учун 200 дан ортиқ хизмат автотранспорт воситалари ҳамда йўл-патруль хизмати шахсий таркиби жалб этилган.
Ҳокимликлар, йўл ҳаракати хавфсизлигини ташкил этиш маркази ва бошқа мутасадди ташкилотлар билан ҳамкорликда оромгоҳларнинг тайёргарлиги комплекс ўрганилиб, дам олиш жойларига олиб борувчи 3 411 км дан ортиқ автомобиль йўллари кўрикдан ўтказилди. 1 297 та йўл белгиси ўрнатилди, 244 км йўлларда чизиқлар чизилди, 368 та пиёдалар ўтиш жойи белгиланди ҳамда 134 км йўл қисми таъмирланди.
Оромгоҳларда ва уларга туташ ҳудудларда жамоат тартибини таъминлаш учун профилактика инспекторлари, патруль-пост хизмати, жамоат тартибини сақлаш бўлинмалари ва ФВВ ходимларидан иборат хизматлар бириктирилди. Ҳар кунлик вазиятни назорат қилиш учун масъул ходимлар белгиланди.
Оромгоҳлар жойлашган ҳудудларда профилактик ишлар кучайтирилди. Видеокузатув тизимларини жорий этиш ва камераларни марказлаштирилган мониторинг тизимига интеграция қилиш масаласига алоҳида эътибор қаратилди.
Йиғилиш якунлари бўйича вояга етмаганлар ўртасида ҳуқуқбузарликларнинг олдини олишни янада кучайтириш, болаларнинг хавфсиз дам олишини таъминлаш ҳамда идоралараро ҳамкорликни мустаҳкамлаш бўйича аниқ топшириқлар берилди.
ИИВ Жамоат хавфсизлиги департаменти Ахборот хизмати