Тошкент вилояти Бўстонлиқ туманида ИИБ ва ДХХ тезкор ходимлари томонидан ерга кўмилган ва томга яширилган гиёҳвандлик воситалари фош этилди
2026-06-05 09:00:00 / Янгиликлар
Айни кунларда Тошкент вилояти бўйлаб гиёҳвандликнинг ҳар қандай кўринишига қарши кескин ва муросасиз курашга қаратилган кенг масштабли назорат-рейд тадбирлари изчил давом эттирилмоқда.
Хусусан, бугун Тошкент вилояти Бўстонлиқ туманида, Ички ишлар органлари ва Давлат хавфсизлик хизмати ҳудудий бўлими тезкор ходимлари томонидан навбатдаги назорат тадбири ўтказилди.
Тадбир давомида туманнинг «Хондайлик» МФЙ ҳудудида жойлашган, хусусий фермер хўжалигига тегишли ер майдонида шох-шаббалар орасида ҳамда парранда боқиш учун қурилган бинонинг том қисмида, жами 7 та шиша идишлар ва 2 дона 10 литр ҳажмдаги челакларга қуритилган, майдаланган ҳолдаги гиёҳвандлик воситалари яшириб сақланаётгани фош этилди.
Ҳолат юзасидан тергов-суриштирув ҳаракатларига киришилган.
Шу ўринда эслатиб ўтамиз, Гиёҳвандлик воситалари билан қонунга хилоф равишда муомала қилиш, оқибатига кўра 20 йилгача озодликдан маҳрум қилиш билан жазоланади.
Тошкент вилояти ИИББ Ахборот хизмати