Ички ишлар вазирлигида хизмат фаолияти самарадорлигини ошириш, ҳуқуқбузарликлар профилактикасини кучайтириш ҳамда киберхавфсизлик масалаларига бағишланган видеоселектор йиғилиши ўтказилди
2026-06-04 10:00:00 / Янгиликлар
Ички ишлар вазири генерал-лейтенант Азиз Ташпулатов томонидан вазирлик соҳавий хизматлари, ҳудудий бўлинмалар раҳбарлари ва шахсий таркиби иштирокида видеоселектор йиғилиши ўтказилди.
Тадбирда мамлакатимизда жамоат хавфсизлигини таъминлаш, ҳуқуқбузарликларни олдини олиш, аҳоли осойишталигини мустаҳкамлаш борасида амалга оширилаётган ишлар танқидий-таҳлилий муҳокама қилинди.
Хусусан, маҳаллаларда хавфсиз муҳит яратиш, криминоген вазиятни барқарор сақлаш ҳамда ҳуқуқбузарликлар профилактикасини янги босқичга олиб чиқиш масалаларига алоҳида эътибор қаратилди. Шу билан бирга, профилактик ҳисобда турган шахслар билан якка тартибда ишлаш, ижтимоий профилактика чораларини кучайтириш ва жиноятларнинг барвақт олдини олиш бўйича аниқ вазифалар белгилаб берилди.
Йиғилишда, шунингдек йўл ҳаракати хавфсизлигини таъминлаш, йўл-транспорт ҳодисаларининг олдини олиш ва фуқаролар хавфсизлигини таъминлаш борасидаги ишлар ҳам таҳлил қилинди.
Киберхавфсизликни таъминлаш ва ахборот технологиялари ёрдамида содир этилаётган жиноятларнинг олдини олиш мақсадида аҳоли ўртасида рақамли маданиятни юксалтириш, интернет тармоғидан хавфсиз фойдаланиш қоидаларини кенг тарғиб қилиш масалаларига алоҳида аҳамият қаратилди. Масъулларга кибержиноятларга қарши курашиш, замонавий таҳлил ва мониторинг тизимларини такомиллаштириш, профилактик тадбирларни кучайтириш ҳамда аҳолини огоҳлантириш ишларини жадаллаштириш бўйича аниқ вазифалар қўйилди.
Йиғилиш кун тартибида аҳоли мурожаатлари билан ишлаш масалалари муҳим ўрин эгаллади. Жараёнда фуқаролар томонидан келиб тушаётган ариза ва шикоятларни ҳар томонлама ўрганиш, уларнинг муаммоларига қонуний ва адолатли ечим топиш, фуқаролар билан мулоқот самарадорлигини ошириш юзасидан тегишли кўрсатмалар берилди.
Тадбир давомида Қўриқлаш хизмати фаолиятини такомиллаштириш, хонадонлар ва турли объектларни қўриқловга жалб қилиш кўламини кенгайтириш, соҳада рақамлаштириш жараёнларини жадаллаштириш, инновацион технологиялар ва замонавий лойиҳаларни амалиётга татбиқ этиш масалалари ҳам кун тартибидан ўрин олди.
Муҳокамалар давомида хизмат фаолиятида йўл қўйилаётган камчиликлар танқидий кўриб чиқилиб, белгиланган вазифалар ижросини таъминлаш борасида масъул раҳбар ва ходимларнинг шахсий масъулияти кучайтирилиши таъкидланди.
Йиғилиш якунида хизмат интизоми ва ижро самарадорлигини ошириш бўйича қатъий талаблар белгиланди. Хизмат вазифаларини бажаришда сусткашликка йўл қўйган ҳамда камчиликларга сабаб бўлган айрим ходимларга нисбатан интизомий жазо чоралари қўлланилди.
Тезкор йиғилишда белгиланган вазифалар ижросини таъминлаш, аҳоли хавфсизлигини янада мустаҳкамлаш ва ички ишлар органлари фаолияти самарадорлигини ошириш бўйича аниқ топшириқлар берилди.