Наманган вилояти ИИБда ўтган беш ой давомида амалга оширилган ишлар ва хизмат фаолиятидаги устувор вазифалар муҳокама қилинди
2026-06-03 17:15:00 / Янгиликлар
Ҳудудларда криминоген вазият барқарорлигини таъминлаш, жиноят ва ҳуқуқбузарликларнинг барвақт олдини олиш, жамоат тартибини сақлаш ҳамда фуқаролар хавфсизлигини ишончли таъминлаш борасида ички ишлар органлари томонидан тизимли ишлар олиб борилмоқда. Шу билан бирга, шахсий таркиб ўртасида хизмат интизоми ва қонунийликни мустаҳкамлаш, ходимларнинг масъулияти ҳамда хизмат вазифаларига ёндашувини оширишга алоҳида эътибор қаратилмоқда.
Хусусан, Наманган вилояти ИИБ бошлиғи ҳузурида видеоселектор тарзида ўтказилган муҳокама йиғилишида жорий йилнинг ўтган беш ойи давомида амалга оширилган ишлар, эришилган натижалар, йўл қўйилган камчиликлар ва уларнинг сабаблари танқидий-таҳлил қилинди. Йиғилишда вилоят, шаҳар ва туман ички ишлар органлари шахсий таркиби иштирок этиб, соҳавий хизматлар ҳамда ҳудудий бўлимлар фаолияти кўриб чиқилди. Камчиликларга йўл қўйган ходимлар қатъий огоҳлантирилди.
Йиғилиш давомида масъул раҳбарларга криминоген вазиятни барқарор сақлаш, жиноят ва ҳуқуқбузарликларнинг олдини олиш бўйича ишларни кучайтириш, хизмат интизоми ва қонунийликни мустаҳкамлаш, фуқаролар билан мулоқотда хизмат маданияти, холислик ва қонунийлик тамойилларига қатъий амал қилиш, коррупцион ҳолатларга йўл қўймаслик ҳамда мавжуд камчиликларни қисқа муддатларда бартараф этиш юзасидан аниқ топшириқлар берилди.
Наманган вилояти ИИБ Ахборот хизмати