Ҳуқуқни муҳофаза қилиш академияси ва Жазони ижро этиш департаменти ўртасида ҳамкорлик меморандуми имзоланди
2026-06-02 09:00:00 / Янгиликлар
Ҳуқуқни муҳофаза қилиш соҳасида давлат органлари ўртасидаги ўзаро ҳамкорликни кенгайтириш, таълим ва амалиёт уйғунлигини таъминлаш ҳамда ижтимоий аҳамиятга эга ташаббусларни қўллаб-қувватлаш бугунги кунда устувор вазифалардан бири ҳисобланади.
Шу мақсадда Ўзбекистон Республикаси Ҳуқуқни муҳофаза қилиш академияси ҳамда Ўзбекистон Республикаси Ички ишлар вазирлиги ҳузуридаги Жазони ижро этиш департаменти ўртасида ўзаро ҳамкорлик меморандуми имзоланди.
Меморандум жазони ижро этиш муассасаларида сақланаётган шахслар, хусусан, вояга етмаганларнинг таълим олиш ҳуқуқларини таъминлаш, уларнинг жамиятга ижтимоий мослашувини қўллаб-қувватлаш ҳамда жиноятчилик такрорланишининг олдини олишга қаратилган тизимли ҳамкорликни ривожлантиришни назарда тутади.
Ҳамкорлик доирасида жазони ижро этиш муассасаларида тарбиявий, маърифий ва ҳуқуқий ишлар самарадорлигини ошириш, вояга етмаганларни таълим ва касбга йўналтириш, уларнинг ҳуқуқий онги ва ижтимоий фаоллигини юксалтиришга қаратилган қўшма чора-тадбирларни амалга ошириш режалаштирилган.
Шунингдек, меморандум ҳуқуқни муҳофаза қилиш соҳасида кадрлар тайёрлаш жараёнида назария ва амалиёт уйғунлигини таъминлаш, таълим жараёнини амалий тажриба билан бойитиш ҳамда Академия тингловчи ва талабаларида жазони ижро этиш тизими фаолиятига оид касбий билим ва кўникмаларни мустаҳкамлашга хизмат қилади.
Томонлар узоқ муддатли, тизимли ва ўзаро манфаатли ҳамкорликни ривожлантириш, мавжуд имкониятлардан самарали фойдаланиш ҳамда ижтимоий аҳамиятга эга ташаббусларни биргаликда амалга ошириш муҳимлигини таъкидладилар.
Ўзбекистон Республикаси Ҳуқуқни муҳофаза қилиш академияси