ИИВ раҳбарияти томонидан болаларни кутиб олишдан оромгоҳгача бўлган хавфсизлик чоралари ўрганилиб, масъулларга тегишли топшириқлар берилди
2026-06-01 12:15:00 / Янгиликлар
Ёзги таътил мавсумида болаларнинг мазмунли ҳордиқ чиқариши, уларнинг хавфсизлигини таъминлаш ҳамда темир йўл объектларида жамоат тартибини сақлаш масалалари доимий эътибор марказида бўлиб келмоқда.
Шу муносабат билан Ўзбекистон Республикаси Ички ишлар вазирининг ўринбосари, генерал-майор Баходир Мирзарахимов томонидан болалар оромгоҳлари фаолияти, оромгоҳларга келувчи болаларни темир йўл вокзалларида кутиб олиш жараёнлари, шунингдек мавжуд шарт-шароитлар ва хавфсизлик чоралари манзилли тарзда ўрганилди.
Ўрганишлар давомида темир йўл транспорти объектларида хизмат олиб бораётган ички ишлар органлари ходимлари томонидан болалар гуруҳларини хавфсиз кузатиб бориш, вокзал ҳудудларида жамоат тартибини таъминлаш, транспорт хавфсизлиги қоидаларига риоя этилишини назорат қилиш масалаларига алоҳида эътибор қаратилди.
Шунингдек, оромгоҳларга етиб келаётган болаларни кутиб олиш ва жойларга хавфсиз етказиш ишларини янада самарали ташкил этиш, профилактик тадбирларни кучайтириш ҳамда масъул ташкилотлар билан ҳамкорликни мустаҳкамлаш бўйича тегишли вазифалар белгилаб берилди.
Тадбир якунида ИИО темир йўл ходимларига хизмат интизомига қатъий риоя қилиш, болалар хавфсизлигини таъминлашда масъулиятни янада ошириш ва ҳар қандай фавқулодда ҳолатларнинг олдини олишга қаратилган чора-тадбирларни изчил амалга ошириш юзасидан аниқ топшириқлар берилди.
Темир йўл транспорти объектларида хизмат қилаётган ички ишлар органлари ходимлари томонидан ёзги мавсум давомида болаларнинг хавфсиз ҳаракатланиши ва оромгоҳлардаги тинч ҳамда хавфсиз муҳитни таъминлаш бўйича ишлар изчил давом эттирилмоқда.
Транспорт ва туризм объектларида хавфсизликни таъминлаш Департаменти Ахборот гуруҳи