Қашқадарё вилояти ҳокими ҳузурида қўриқлашнинг техник воситаларини маҳаллийлаштириш ҳамда Қўриқлаш хизматини ривожлантириш масалалари муҳокама қилинди
2026-05-27 11:50:00 / Янгиликлар
Қашқадарё вилояти ҳокими Муроджон Азимов, вилоят Ички ишлар бошқармаси бошлиғи полковник Абдувохид Исмоилов ҳамда соҳага дахлдор мутасадди раҳбарлар томонидан Қарши шаҳрида жойлашган “ALP TEXNO SERVIS” хусусий корхонасига қарашли “S-SMART” Буюк Турон кичик саноат зонасига ташриф амалга оширилди.
Ташриф доирасида мутасадди раҳбарлар томонидан “S-SMART” хусусий корхонасининг ишлаб чиқариш жараёнлари, техник имкониятлари, мавжуд инфратузилмаси ҳамда хавфсизлик соҳасида жорий этилаётган замонавий ечимлар билан яқиндан танишилди.
Тадбир давомида техник қўриқлаш йўналишида ишлаб чиқилган “S-SMART Security” маҳаллийлаштирилган техник ҳимоя дастурий тизимининг тақдимоти ўтказилди. Мазкур тизим объектлар ва хонадонларни ишончли муҳофаза қилиш, хавфли ҳолатлар юзасидан тезкор хабар бериш, шунингдек, жамоат ва хусусий хавфсизликни таъминлашга қаратилган замонавий ечим сифатида эътироф этилди.
Шунингдек, тақдимот жараёнида техник воситаларнинг имкониятлари, уларнинг ишлаш механизми, техник қўриқлаш тизимларини янада такомиллаштириш, соҳада рақамлаштириш жараёнларини кенгайтириш ҳамда Қўриқлаш хизмати тизими самарадорлигини оширишга қаратилган истиқболли йўналишлар юзасидан фикр алмашилди.
Таъкидланганидек, бундай инновацион ва маҳаллийлаштирилган хавфсизлик тизимларини амалиётга кенг жорий этиш соҳада самарадорликни янада ошириш, мол-мулк дахлсизлигини таъминлаш, аҳоли ҳамда тадбиркорлик субъектларига сифатли ва ишончли хизмат кўрсатишда муҳим аҳамият касб этади.