Ўзбекистон Республикаси Ички ишлар вазирлиги

Ўзбекистон Республикаси Ички ишлар вазирининг ўринбосари, полковник Д.Н. Саттаров Бухоро вилоятига ташрифи давомида ҳудудларда жамоат хавфсизлигини таъминлаш борасида амалга оширилаётган ишлар билан яқиндан танишди. Бухоро вилояти Ички ишлар бошқармаси бошлиғи ҳамроҳлигида амалга оширилган ушбу ўрганишлар Қурбон ҳайити намозларини кўнгилсиз ҳолатларсиз, тинч ва осойишта ўтказиш ҳамда фуқароларимизнинг хавфсизлигини таъминлаш мақсадига қаратилди.

Дастлабки манзил Шофиркон тумани Ички ишлар бўлими биноси бўлди. Бу ерда масжидларда хавфсизликнинг қандай таъминланганлиги ҳамда байрам тадбирлари давомида шахсий таркиб ходимларининг хизмат фаолияти акс этган махсус тақдимот намойиш этилди. Шундан сўнг, масъул раҳбарлар Ғиждувон туманида жойлашган Абдухолиқ Ғиждувоний зиёратгоҳига ташриф буюриб, ҳайит намозига тайёргарлик кўриш доирасида хизматга жалб қилинган ходимларнинг шайлигини ва масъулиятини текширдилар.

Ўрганиш ишлари Вобкент туманида давом эттирилди. Хусусан, туман ҳудудидаги Анжир Фағнавий зиёратгоҳида ташкил этилган хизмат жараёнлари бевосита жойига чиққан ҳолда ўрганилди. Шунингдек, Вобкент тумани Марказий ўйингоҳида жамоат тартибини сақлаш ва фуқаролар хавфсизлигини таъминлаш мақсадида хизматга жалб қилинган шахсий таркиб билан учрашув ўтказилиб, уларга хизмат интизомига риоя қилиш ҳамда ҳушёрликни ошириш бўйича тегишли йўриқнома ва аниқ кўрсатмалар берилди.

Ташрифнинг кейинги босқичида Ромитан туманидаги табаррук масканлар қамраб олинди. Жумладан, тумандаги Бобойи Самосий ҳамда Хожа Али Ромитаний зиёратгоҳларида хизмат олиб бораётган ходимларнинг фаолияти батафсил кўздан кечирилди. Жараён давомида ходимларнинг эътиборини кучайтириш, ҳар қандай вазиятда ҳам фуқароларимизнинг хотиржам ва хавфсиз ибодат қилишлари учун зарурий барча чораларни кўриш бўйича устувор вазифалар белгилаб берилди.