ИИВ ҳузуридаги Жазони ижро этиш департаменти ҳамда Қоровул қўшинлари қўмондонлиги масъул раҳбарлари иштирокида қўшма йиғилиш ташкил этилди
2026-05-26 11:55:00 / Янгиликлар
Мазкур йиғилиш видеоселектор тарзида ўтказилиб, унда тизимда амалга оширилаётган ислоҳотлар, ҳамкорликни янада мустаҳкамлаш ҳамда хизмат фаолияти самарадорлигини ошириш масалалари муҳокама қилинди.
Йиғилиш давомида ушбу икки тузилма фаолияти ягона мақсад — мамлакатда қонун устуворлигини таъминлаш, жазони ижро этиш муассасаларида тартиб-интизомни мустаҳкамлаш ва хавфсизликни таъминлашга хизмат қилишини алоҳида таъкидланди. Шунингдек, сўнгги йилларда тизимда олиб борилаётган кенг кўламли ислоҳотлар, замонавий ёндашувлар ва яратилаётган шарт-шароитлар ходимлар фаолиятида муҳим аҳамият касб этаётгани алоҳида қайд этилди.
Шу билан бирга, жазони ижро этиш муассасаларида хизмат самарадорлигини ошириш, маҳкумлар билан ишлаш тизимини такомиллаштириш, хавфсизлик чораларини кучайтириш ҳамда шахсий таркибнинг жанговар ва маънавий тайёргарлигини янада ошириш юзасидан фикр-мулоҳазалар ва таклифлар билдирилди. Масъуллар томонидан мавжуд муаммоларни бартараф этиш, ўзаро ҳамкорликни мустаҳкамлаш ва хизмат фаолиятини янги босқичга олиб чиқиш бўйича муҳим вазифалар белгилаб олинди.
Ташкилий ва кўтаринки руҳда ўтган йиғилиш якунида Олтинчи минтақавий ҳудуд 1-сон жазони ижро этиш колониясида жанговар шайликни янада мустаҳкамлаш мақсадида ўтказилган махсус ўқув машғулотлари видеоконференсалоқа орқали намойиш этилди. Машғулотларда шахсий таркибнинг фавқулодда вазиятлардаги ҳаракатлари, тезкорлик, ҳамжиҳатлик ва касбий тайёргарлиги амалий тарзда кўрсатиб берилди. Мазкур тадбир тизимда хизмат қилаётган ходимларнинг масъулияти, фидойилиги ҳамда хизматга бўлган садоқатини яна бир бор намоён этди.