Бухоро вилояти Вобкент туманида «Обод ва хавфсиз маҳалла» тамойили асосида ижтимоий профилактика самарадорлигини ошириш бўйича ўқув амалий семинар ўтказилди
2026-05-25 09:00:00 / Янгиликлар
Вазирлар Маҳкамасининг маҳаллаларда «Обод ва хавфсиз маҳалла» тамойили асосида хавфсиз муҳит яратиш механизмларини белгилашга қаратилган 754-сон қарори талаблари ҳамда ижтимоий профилактика тизимининг мазмун-моҳиятини кенг тарғиб қилиш мақсадида «маҳалла еттилиги» вакиллари иштирокида ўқув-амалий семинар ташкил этилди.
Семинарда Ўзбекистон Республикаси ИИВ Академияси, Тошкент давлат юридик университети профессор-ўқитувчилари, вилоят Адлия бошқармаси ҳамда вилоят ИИБ мутахассислари иштирок этдилар.
Тадбир давомида ИИВ Академияси профессор-ўқитувчилари томонидан ижтимоий профилактика йўналишида, Тошкент давлат юридик университети профессор-ўқитувчилари томонидан эса оилавий низоларни медиация йўли билан ҳал этиш масалаларига бағишланган машғулотлар ўтказилди.
Шунингдек, ижтимоий профилактика соҳасида идоравий назоратни кучайтириш мақсадида «E-Ijtimoiy profilaktika» электрон ахборот тизимида маҳалла еттилиги томонидан йўл қўйилган айрим камчиликлар муҳокама қилиниб, уларни бартараф этиш юзасидан зарур тушунтириш ва тавсиялар берилди.
Семинар иштирокчиларининг билим ва кўникмаларини ошириш ҳамда маҳаллаларда хавфсиз муҳитни таъминлаш борасидаги ҳамкорликни янада мустаҳкамлашга хизмат қилди.
Бухоро вилояти ИИБ Ахборот хизмати