ИИВ раҳбарияти Халқаро гуллар фестивалида жамоат тартиби ва хавфсизликни таъминлаш бўйича комплекс чора-тадбирлар ташкил этилишини ўрганмоқда
2026-05-24 14:00:00 / Янгиликлар
Ички ишлар вазирининг биринчи ўринбосари – Жамоат хавфсизлиги департаменти бошлиғи генерал-майор Рустам Джураев «65- Халқаро гуллар фестивали» давомида жамоат тартиби ва фуқаролар хавфсизлигини таъминлаш юзасидан кўрилган чора-тадбирларни ўрганиш мақсадида Наманган вилоятига ташриф буюрди.
Фестиваль давомида Ички ишлар вазирлиги томонидан Миллий гвардия ва бошқа ҳуқуқни муҳофаза қилувчи органлар билан ҳамкорликда белгиланган тадбирлар ўтказиладиган ҳудудларда жамоат тартибини таъминлаш, иштирокчилар ва меҳмонлар хавфсизлигини сақлаш бўйича комплекс чора-тадбирлар амалга оширилмоқда. Тадбирга 1 миллионга яқин хорижий сайёҳлар ҳамда республиканинг барча ҳудудларидан 7 миллион нафарга яқин юртдошларимизнинг ташриф буюриши кутилмоқда.
Жумладан, фестиваль бўлиб ўтаётган Наманган шаҳрининг Бобур номидаги боғида навбатчилик асосида тиббий постлар, адашиб қолган болалар учун пунктлар ҳамда Миллий гвардия пунктлари ташкил этилган бўлиб, фуқаролар фавқулодда ҳолатларда мазкур жойларга мурожаат қилишлари мумкин.
Фестиваль очилиш куни «Наманган» аэропортидан Бобур боғигача қарийб 200 та автомашина иштирокида автопарад бўлиб ўтади. Узунлиги 14 километрни ташкил этувчи гуллар билан безалган автокарвон ҳаракати йўналиши бўйлаб ЙҲХХ, ППХ ва Миллий гвардия ходимлари хизмат олиб бормоқда.
Умуман олганда, 50 кун давом этадиган фестиваль доирасида 150 дан ортиқ маданий, маърифий ва кўнгилочар тадбирлар ўтказилиши режалаштирилган.
Шунингдек, тадбир ҳудуди атрофидаги кузатув камералари Наманган вилояти ИИБ Ситуацион марказига интеграция қилиниб, шу ернинг ўзида фестиваль давомида тинч ва хавфсиз муҳитни таъминлашга жалб этилган куч ва воситалар фаолияти мувофиқлаштирилган.
ИИВ Жамоат хавфсизлиги департаменти Ахборот хизмати