Оила ва хотин-қизлар қўмитаси раҳбарияти Бухоро вилояти ички ишлар бошқармасининг хотин-қизлар ҳуқуқларини ҳимоя қилиш борасидаги профилактик ишлари билан танишди
2026-05-22 10:00:00 / Янгиликлар
Оила ва хотин-қизлар қўмитаси раисининг биринчи ўринбосари Абдуллаева Умида Ҳазратовна Бухоро вилояти ички ишлар бошқармасига ташриф буюриб бошқарма ҳузурида ташкил этилган «Ташкилий-таҳлил» штаби фаолияти билан яқиндан танишди.
Мазкур учрашув давомида вилоят ҳудудида оила-турмуш муносабатлари доирасида содир этилиши мумкин бўлган жиноят ҳамда ҳуқуқбузарликларнинг барвақт олдини олиш борасида амалга оширилаётган тизимли ишлар ва чора-тадбирлар атрофлича муҳокама қилинди.
Мулоқот жараёнида вилоят жамоат хавфсизлиги хизмати ҳуқуқбузарликлар профилактикаси бошқармаси бошлиғининг ўринбосари – «Ташкилий-таҳлил» штаби раҳбари томонидан меҳмонга таҳлилий штабнинг иш механизми, вилоятда мазкур йўналишда олиб борилаётган кенг кўламли ишлар ва ҳозиргача эришилган ижобий натижалар хусусида батафсил маълумот берувчи махсус тақдимот намойиш этилди.
Таҳлиллар давомида хотин-қизлар ҳуқуқларини ҳимоя қилиш ҳамда оилалардаги ижтимоий-маънавий муҳитни соғломлаштириш масалаларига алоҳида эътибор қаратилди.
Тақдимот якунида Умида Абдуллаева штаб томонидан йўлга қўйилган тизимли ёндашувни алоҳида эътироф этган ҳолда келгусида мазкур йўналишда амалга оширилиши лозим бўлган чора-тадбирлар самарадорлигини янада ошириш ва ҳамкорликни кучайтириш юзасидан ўзининг муҳим тавсия ҳамда кўрсатмаларини билдирди.
Бухоро вилояти ИИБ Ахборот хизмати