ИИВ раҳбарияти томонидан Тошкент шаҳри Миробод туманида ўрганиш ишлари давом этмоқда
2026-05-21 11:35:00 / Янгиликлар
Тошкент шаҳри Миробод туманида жамоат хавфсизлигини таъминлаш, ёшлар тарбияси, маҳаллаларда тинчлик ва осойишталикни мустаҳкамлаш ҳамда профилактик тадбирлар самарадорлигини ошириш мақсадида кенг кўламли ўрганиш ишлари олиб борилди.
Ўрганишлар давомида Ўзбекистон Республикаси Ички ишлар вазирлиги ўринбосари, генерал-майор Баходир Мирзараҳимов раҳбарлигида Миробод туманида жойлашган “Абдурауф Фитрат” маҳалласи, Фурқат боғи ҳамда 158-сонли умумтаълим мактабида мавжуд шарт-шароитлар, хавфсизлик чоралари ва профилактик ишлар ҳолати атрофлича ўрганилди.
Тадбир давомида маҳалла еттилиги фаолиятига алоҳида эътибор қаратилди. Хусусан, маҳалла раиси, профилактика инспектори, ёшлар етакчиси, хотин-қизлар фаоли, ижтимоий ходим, солиқ инспектори ҳамда ҳоким ёрдамчиси ўртасидаги ҳамкорликни янада кучайтириш, аҳоли муаммоларини ўз вақтида аниқлаш ва бартараф этиш бўйича муҳим вазифалар белгилаб берилди.
Шунингдек, жамоат жойлари, боғ ҳудудлари ва таълим муассасаларида хавфсизликни таъминлаш мақсадида камералаштириш ишларини кенгайтириш, замонавий видеокузатув мосламаларини ўрнатиш ҳамда уларни ягона мониторинг тизимига интеграция қилиш юзасидан масъулларга тегишли топшириқлар берилди. Бу эса ҳуқуқбузарликларнинг олдини олиш, тезкор назоратни кучайтириш ва фуқаролар хавфсизлигини таъминлашда муҳим аҳамият касб этиши таъкидланди.
158-мактабда ёшлар тарбияси, давомат, профилактик тадбирлар ҳамда ўқувчиларнинг бўш вақтларини мазмунли ташкил этиш ишлари кўздан кечирилди. Масъулларга ёшларни турли салбий таъсирлардан асраш, уларнинг таълим-тарбиясига янада жиддий ёндашиш бўйича тавсиялар берилди.
Фурқат боғида эса аҳоли ва ёшлар учун яратилган шароитлар, жамоат тартиби, хавфсизлик инфратузилмаси ҳамда тунги ёритиш тизимлари ўрганилиб, мавжуд камчиликларни бартараф этиш юзасидан аниқ вазифалар белгилаб олинди.
Мазкур ўрганишлар аҳоли тинчлиги, маҳаллалар хавфсизлиги ва профилактика тизими самарадорлигини оширишга хизмат қилиши билан аҳамиятли бўлди.
Транспорт ва туризм объектларида хавфсизликни таъминлаш Департаменти Ахборот гуруҳи