Ички ишлар вазири томонидан Жазони ижро этиш тизимида яратилган қулайликлар ва рақамлаштириш бўйича амалга оширилаётган ишлар танқидий муҳокама қилинди
2026-05-21 07:30:00 / Янгиликлар
ИИВ Жазони ижро этиш департаментида тизим фаолиятини тубдан трансформация қилишга қаратилган истиқболли чора-тадбирлар юзасидан тайёрланган тақдимоти кўриб чиқилди.
Тадбир давомида жазони ижро этиш муассасаларида барча жараёнларни рақамлаштириш, сунъий интеллект ва “Ақлли мониторинг” тизимини жорий этиш, муассасаларни замонавий муҳандислик-коммуникация тармоқлари ҳамда хавфсизлик воситалари билан жиҳозлаш масалалари муҳокама қилинди. Шунингдек, маҳкумларни ижтимоийлаштириш ва уларни жамиятга мослаштириш бўйича самарали механизмларни амалиётга татбиқ этиш, тиббий хизмат сифатини ошириш ҳамда ишлаб чиқариш жараёнларини такомиллаштириш юзасидан режалар тақдим этилди.
Тақдимот доирасида ички ишлар органлари ходимлари учун маҳаллий ишлаб чиқариш корхоналарида тайёрланган махсус кийим-бошлар, шунингдек жазо муддатини ўтаётган вояга етмаганлар учун иқлим шароити ва замонавий талаблар асосида ишлаб чиқилган кийим намуналари намойиш қилинди.
Бундан ташқари, Марказий тергов ҳибсхонаси бино ва иншоотларида маҳкумлар ва уларнинг яқинлари учун яратилган шароитлар ҳамда реконструкция ишлари билан яқиндан танишилиб, уларнинг сифати ва самарадорлиги юзасидан фикр-мулоҳазалар билдирилди.
Тақдимот якунида мутасадди раҳбарларга рақамли технологияларни янада кенг жорий этиш, муассасалар хавфсизлигини кучайтириш ҳамда ходимларни ижтимоий ҳимоя қилиш чораларини такомиллаштириш бўйича аниқ вазифалар юклатилди.