Ўзбекистон Республикаси Ички ишлар вазирлиги

Ички ишлар вазирлиги раҳбарияти томонидан Тошкент шаҳрининг Миробод туманида жойлашган “Чинор” ва “Баратхўжа” маҳаллаларида жамоат хавфсизлигини таъминлаш, ҳуқуқбузарлик ва жиноятларнинг олдини олиш, аҳоли осойишталигини сақлаш борасида амалга оширилаётган ишлар кенг қамровда ўрганилди.

Ўрганишлар давомида маҳаллаларда маҳалла еттилиги томонидан олиб борилаётган ишлар, аҳоли мурожаатлари билан ишлаш тизими, ижтимоий профилактика тадбирлари ҳамда ҳуқуқбузарликларнинг барвақт олдини олишга қаратилган чоралар таҳлил қилинди. Шунингдек, профилактика инспекторларининг хизмат фаолияти, фуқаролар билан мулоқот олиб бориш, муаммоли оилалар ва назоратда турувчи шахслар билан ишлаш ҳолати ҳам кўздан кечирилди.

Маҳаллалар ҳудудида жойлашган “Марказий савдо дўкон”ларида хавфсизликни таъминлаш, савдо объектларини камералаштириш, рақамли кузатув тизимларини кенгайтириш ва уларнинг самарали ишлаш ҳолати атрофлича ўрганилди. Савдо нуқталарида ўрнатилган видеокузатув мосламаларининг жиноятчилик ва ҳуқуқбузарликларнинг олдини олишдаги аҳамияти алоҳида таъкидланди.

Шу билан бирга, патрул-пост хизмати ходимларининг хизмат фаолияти, ҳудудларда жамоат тартибини сақлаш, тунги вақтда аҳоли хавфсизлигини таъминлаш, профилактик рейдлар ўтказиш ҳамда фуқароларнинг тинч ва хавфсиз ҳаёт кечиришини таъминлаш борасида амалга ошираётган ишлар ҳам таҳлил қилинди. Ходимларнинг хизмат интизоми, хизматни ташкил этиш тартиби ва замонавий техник воситалардан фойдаланиш ҳолати ўрганилди.

Шунингдек, тумандаги 218-сон умумтаълим мактабида ўқувчилар хавфсизлигини таъминлаш, ёшлар ўртасида ҳуқуқбузарликларнинг олдини олиш, таълим муассасаси ҳудудида назорат тизимларини кучайтириш ҳамда профилактик тадбирларни самарали ташкил этиш борасида олиб борилаётган ишлар кўриб чиқилди. Мактаб маъмурияти ва масъул ходимларга ўқувчилар хавфсизлигини таъминлаш бўйича тегишли тавсия ва кўрсатмалар берилди.

Бундан ташқари, “Матонат” метро бекатида хизмат олиб бораётган ходимларнинг хизмат фаолияти, йўловчилар хавфсизлигини таъминлаш, жамоат тартибини сақлаш, фавқулодда ҳолатларнинг олдини олиш ҳамда метро ҳудудида профилактик чора-тадбирларни амалга ошириш ишлари ҳам атрофлича ўрганилди. Метрополитен ҳудудида олиб борилаётган назорат ва кузатув ишларининг самарадорлиги, ходимларнинг хизмат олиб бориш жараёни ҳам таҳлил қилинди.

Ўрганишлар якунида мутасаддиларга маҳаллаларда хавфсиз муҳитни янада мустаҳкамлаш, рақамли кузатув тизимларини кенгайтириш, патрул-пост хизмати ва профилактика инспекторлари фаолияти самарадорлигини ошириш, жамоат тартибини сақлаш ҳамда аҳоли осойишталигини таъминлаш юзасидан тегишли кўрсатмалар берилди.