Ўзбекистон Республикаси Ички ишлар вазирлиги

Ўзбекистон Республикаси Ички ишлар вазирининг тегишли кўрсатмасига мувофиқ, вазирлик соҳавий хизмат раҳбарлари томонидан ҳудудий ички ишлар органлари фаолиятини жойига чиққан ҳолда ўрганиш ҳамда амалий ёрдам кўрсатиш ишлари изчил давом этмоқда.

Хусусан, Ўзбекистон Республикаси ИИВ ҳузуридаги Миграция ва персоналлаштириш департаменти бошлиғи, полковник Улуғбек Ташходжаев томонидан Хоразм вилояти Ички ишлар бошқармаси ҳузуридаги Миграция ва персоналлаштириш бошқармаси ҳамда унинг қуйи тизимларида амалга оширилаётган ишлар атрофлича ўрганилди.

Жорий йилнинг 15–16 май кунлари давомида ўтказилган ўрганишлар жараёнида соҳадаги фаолиятнинг қонунчилик асослари ва амалий ижросига алоҳида эътибор қаратилди.

Жумладан, Ўзбекистон Республикасининг “Фуқаролик тўғрисида”ги Қонуни, фуқароларни ва чет эл фуқароларини яшаш ҳамда турган жойи бўйича рўйхатдан ўтказишга оид янги таҳрирдаги қонун ҳужжатлари, шунингдек, идентификация ID-карталарни жорий этиш, биометрик паспорт тизимини такомиллаштириш ва миграция соҳасини рақамлаштиришга қаратилган Президент фармон ва қарорлари ижроси таҳлил қилинди.

Шу билан бирга, Вазирлар Маҳкамасининг чет эл фуқаролари ва фуқаролиги бўлмаган шахсларнинг республика ҳудудига кириши, бўлиши ва транзит тартибларини белгилаб берувчи қарорлари асосида амалга оширилаётган ишлар, айниқса уларни рўйхатга олиш жараёнларини соддалаштириш бўйича яратилган қулайликлар ҳам ўрганилди.

Ўрганишлар давомида ходимларнинг қонунчиликка қатъий риоя этиши, хизмат интизоми ва ижрочилик маданияти, аҳолига кўрсатилаётган давлат хизматларининг сифати, фуқаролар учун яратилган шароит ва қулайликлар атрофлича таҳлил этилди.

Шунингдек, жойларда аниқланган камчиликларни бартараф этиш, хизмат самарадорлигини янада ошириш, замонавий ахборот технологияларини кенг жорий этиш ҳамда аҳолига хизмат кўрсатиш сифатини яхшилаш юзасидан масъулларга тегишли кўрсатмалар ва услубий ёрдамлар берилди.

Хоразм вилояти ИИБ Ахборот хизмати