Сирдарё вилояти ИИБ раҳбарияти томонидан ходимларининг тўрт ойлик фаолиятига бағишланган кенгайтирилган йиғилиш бўлиб ўтди
2026-05-17 17:55:00 / Янгиликлар
Йиғилишда хизматнинг ҳудудий бўлинмалари раҳбарлари, профилактика инспекторлари ,соҳа масъул ходимлари ҳамда ходимларнинг ота-оналари иштирок этди.Йиғилиш давомида шунингдек давлатимиз раҳбари томонидан ички ишлар органлари олдига қўйилган устувор вазифалар, жамоат хавфсизлигини таъминлаш, маҳаллаларда жиноятчиликни жиловлаш, аҳоли билан манзилли ишлаш ҳамда «фуқаробай» тизими асосида профилактик фаолият самарадорлигини янада ошириш масалаларига алоҳида эътибор қаратилди.
Шундан сўнг Ҳуқуқбузарликлар профилактикаси хизмати томонидан жорий йилнинг ўтган 4 ойи давомида амалга оширилган ишлар, эришилган натижалар ҳамда йўл қўйилган камчиликлар танқидий-таҳлилий руҳда кўриб чиқилди.
Айрим ҳудудларда хизмат интизоми, фуқаролар билан ишлаш маданияти, мурожаатлар билан ишлаш сифати ҳамда профилактик тадбирларни ташкил этишдаги сусткашликларни бартараф этиш юзасидан масъулларга аниқ кўрсатма ва топшириқлар берилди.
Тадбирнинг якуний қисмида эса хизмат фаолиятида юқори натижаларга эришиб, вилоятда тинчлик ва осойишталикни сақлаш, ҳуқуқбузарликларнинг олдини олиш ҳамда ҳамкасбларига ҳар томонлама ўрнак бўлиб келаётган бир гуруҳ ходимлар пул мукофотлари билан, уларнинг ота-оналари эса бошқарма бошлиғининг ташаккурномаси билан тақдирланди.
Сирдарё вилояти ИИБ Ахборот хизмати