Бухоро вилояти ИИБ Вояга етмаганларга ижтимоий-ҳуқуқий ёрдам кўрсатиш маркази фаолияти масъуллар томонидан ўрганилди
2026-05-16 09:00:00 / Янгиликлар
Ўзбекистон Республикаси Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизмати бошлиғининг ўринбосари ҳамда Бухоро вилояти Ички ишлар бошқармаси Жамоат хавфсизлиги хизмати Ҳуқуқбузарликлар профилактикаси бошқармаси бошлиғи иштирокида вилоятдаги Вояга етмаганларга ижтимоий-ҳуқуқий ёрдам кўрсатиш марказининг иш фаолияти ва у ердаги мавжуд ҳолат атрофлича ўрганиб чиқилди.
Мазкур жараёнда марказга келтирилган болаларнинг яшаш овқатланиш ва бўш вақтларини мазмунли ўтказиш шароитлари шунингдек уларга кўрсатилаётган ҳуқуқий тиббий ҳамда психологик ёрдамнинг сифати бевосита кўздан кечирилди.
Ўрганишлар давомида раҳбарлар томонидан марказ ходимларининг ёшлар билан ишлаш тизими қийин ҳаётий вазиятга тушиб қолган ўсмирларни ижтимоий ҳаётга мослаштириш ва соғлом муҳитга қайтариш борасида амалга ошираётган чора-тадбирлари чуқур таҳлил қилинди.
Вояга етмаганлар ўртасида назоратсизлик ва ҳуқуқбузарликларнинг барвақт олдини олиш уларнинг қонуний манфаатларини ишончли ҳимоя қилиш тизимини янада такомиллаштириш юзасидан истиқболдаги вазифалар муҳокама қилинди.
Якунда марказ иш унумдорлигини ошириш ва ёшлар учун янада қулай ижтимоий-ҳуқуқий шароитлар яратиш бўйича масъул ходимларга қатор аниқ кўрсатма ҳамда топшириқлар берилди.
Бухоро вилояти ИИБ Ахборот хизмати