Фарғона вилояти ички ишлар органлари фаолияти самарадорлигини ошириш ва илғор бошқарув ёндашувларини жорий этиш йўлида
2026-05-16 09:00:00 / Янгиликлар
Ички ишлар вазирининг биринчи ўринбосари — Жамоат хавфсизлиги департаменти бошлиғи генерал майор Рустам Джураев Фарғона вилоятининг барча туманларига ташриф буюриб, ички ишлар органлари, уларнинг таркибий ва ҳудудий бўлинмалари фаолияти ҳамда аввал берилган топшириқлар ижроси ҳолатини ўрганди.
Ўрганиш натижаларига кўра, унинг раислигида Фарғона вилояти ИИБ раҳбарияти ва туман бўлинмалари раҳбарлари иштирокида кенгайтирилган йиғилиш ўтказилиб, унда тезкор-хизмат фаолияти ҳолати, ҳуқуқбузарликларнинг олдини олиш ва ҳисобот давридаги ишлар натижалари бўйича масъул раҳбарларнинг маърузалари эшитилди.
Йиғилиш давомида Фарғона вилояти ички ишлар органлари фаолиятига «Мирзо-Улуғбек» ва «Чилонзор» тажрибаларига асосланган бошқарув ёндашувларини жадал ва тизимли жорий этиш заруратига алоҳида эътибор қаратилди.
Шу сабабли, туман ва шаҳар ҳокимликлари ҳузурида ички ишлар органлари ҳамда ҳамкор ташкилот (энергетика, газ ва сув таъминоти, коммунал хизматлар, соғлиқни сақлаш, бандлик ва бошқалар) вакиллари иштирокида идоралараро штаблар ташкил этиш, уларнинг узлуксиз фаолиятини ягона тезкорлик механизми сифатида йўлга қўйиш вазифаси юклатилди.
Аҳоли гавжум жойларда жамоат тартибини сақлаш ва фуқаролар хавфсизлигини таъминлаш масаласига алоҳида топшириқ берилди.
Хусусан, ҳар куни ўртача 40–50 минг нафар аҳоли ва меҳмонлар, жумладан вилоят ва водий аҳолиси, шунингдек хорижий давлатлардан келувчи меҳмонлар ташриф буюрадиган «Марғилон Сити» турар-жой ва савдо мажмуаси ҳудудида жамоат тартиби устидан доимий назоратни кучайтириш, тизимли профилактик назоратни йўлга қўйиш, ҳамда мазкур ҳудудда оператив вазиятнинг барқарорлигини таъминлаш вазифаси юклатилди.
Шунингдек, фуқаролар мурожаатлари билан ишлаш сифатини яхшилаш, бошқарув жараёнларини рақамлаштиришни кучайтириш, замонавий таҳлилий инструментлар ва технологиялар, шу жумладан сунъий интеллект элементларини кенг жорий этиш бўйича топшириқлар берилди.
Йиғилиш якунида генерал майор Рустам Джураев томонидан аниқ кўрсатма ва манзилли вазифалар белгилаб берилди.
ИИВ Жамоат хавфсизлиги департаменти Ахборот хизмати