Ўзбекистон Республикаси Ички ишлар вазирлиги

15 май — Халқаро оила куни муносабати билан Ички ишлар вазирлиги тизимида хизмат қилаётган ходимлар ўртасида 2022 йилдан буён «Намунали оила» кўрик-танлови ўтказиб келинмоқда.

Мазкур танловдан кўзланган асосий мақсад — оила муқаддаслигини улуғлаш, миллий қадриятларни асраб-авайлаш, ички ишлар органлари ходимлари оилалари ўртасида соғлом маънавий муҳитни мустаҳкамлаш, ёшларни оилавий ҳаётга тайёрлаш ҳамда ибратли оилалар тажрибасини оммалаштиришдан иборат.

Жумладан, бу йил ҳам танловнинг республика босқичи Бўстонлиқ туманидаги ИИВ «Оқтош» оромгоҳида юқори савияда ташкил этилди. Танловнинг ҳудудий саралаш босқичларида республика бўйлаб 300 дан ортиқ оила иштирок этди. Саралаш жараёнлари якунига кўра энг муносиб деб топилган 19 та оила республика босқичига йўлланмани қўлга киритди.

Тадбирда вазирлик раҳбарияти, маънавият ва маърифат соҳаси вакиллари, ижодкорлар ҳамда жамоатчилик фаоллари иштирок этди.

Кўрик-танлов иштирокчилари «Таништириш», «Бу менинг оилам», «Биз китобхон оиламиз» каби шартлар орқали ўзларининг ҳаёт тарзи, оилавий анъаналари, китобхонлик маданияти ва ижодий салоҳиятини намоён этди. Миллий қўшиқ, шеър, саҳна кўринишлари ва рақслар тадбирга янада кўтаринки руҳ бағишлади.

Танлов якунига кўра, 1-ўрин — катта сержант Розиқовлар оиласи (Навоий вилояти), 2-ўрин — майор Абдуллаевлар оиласи (ИИВ марказий аппарат), 3-ўрин — майор Жумабоевлар (Транспорт ва туризм объектларида хавфсизликни таъминлаш департаменти) оиласи эгаллади.

Шунингдек, қатор иштирокчилар турли номинациялар бўйича ҳам тақдирланди. Жумладан, «Зукко оила» — Тошкент вилояти ИИББ катта сержант Тўхтасиновлар оиласи, «Фаол оила» — Тошкент шаҳар ИИББ майор Розиқовлар оиласи, «Ибратли оила» — Андижон вилояти ИИБ капитан Аббосхоновлар оиласи, «Ижодкор фарзанд» — Фарғона вилояти ИИБ майор Асқаровлар оиласи, «Спортчи оила» — Жазони ижро этиш департаменти Бахриддиновлар оиласи.

Шу билан бирга, тадбир доирасида оромгоҳда ходимларнинг оила аъзолари учун мазмунли дам олиш тадбирлари ташкил этилиб, жумладан, хотин-қизлар иштирокида давра суҳбати ҳамда болалар ўртасида турли заковат ва қизиқарли баҳру байт ўйинлари ўтказилди.

Тадбир давомида сўзга чиққанлар оила жамиятнинг энг мустаҳкам пойдевори эканини, айниқса ҳуқуқни муҳофаза қилувчи тизим ходимлари учун соғлом ва аҳил оила муҳити катта аҳамият касб этишини таъкидлади.