Ички ишлар вазирлиги раҳбарияти Қорақалпоғистонда маҳаллалар фаолияти ва ёшлар учун яратилган шароитлар билан танишди
2026-05-15 11:00:00 / Янгиликлар
Ички ишлар вазирлиги раҳбарияти томонидан Қорақалпоғистон Республикасида аҳоли, айниқса ёшлар билан ишлаш, улар учун яратилган шарт-шароитларни ўрганиш ҳамда маҳаллаларда ҳуқуқбузарликларнинг олдини олиш борасида амалга оширилаётган ишлар билан танишиш мақсадида қатор манзилларда учрашувлар ўтказилди.
Жумладан, Нукус шаҳридаги “Жеке терек” ва “Туран” маҳаллалари, шунингдек, Тахиатош туманидаги “Жайхун” маҳалласига ташриф буюрилиб, маҳаллаларнинг “еттилиги” фаолияти, аҳоли билан ишлаш тизими ҳамда ёшларга яратилган имкониятлар атрофлича кўздан кечирилди.
Ташриф давомида маҳаллаларда ёшларнинг бўш вақтларини мазмунли ташкил этиш, уларни касб-ҳунар ва спортга жалб қилиш, маънавий-маърифий тадбирларни кучайтириш борасида амалга оширилаётган ишлар муҳокама қилинди. Шу билан бирга, ёшлар ўртасида ҳуқуқбузарлик ва жиноятчиликнинг олдини олишда профилактика инспекторларининг ўрни алоҳида таъкидланди.
Профилактика инспекторлари томонидан маҳаллаларда фуқаролар, айниқса ёшлар билан доимий мулоқот ўрнатиш, муаммоларни ўз вақтида аниқлаш ва бартараф этиш, нотинч оилалар ҳамда назоратдаги шахслар билан манзилли ишлар олиб бориш орқали тинчлик ва осойишталикни таъминлашга алоҳида эътибор қаратилмоқда.
Шунингдек, Ички ишлар вазирлиги раҳбарияти Нукус шаҳридаги 55-сонли умумий ўрта таълим мактабида ҳам бўлиб, таълим муассасасида ўқувчилар учун яратилган шарт-шароитлар, замонавий синфхоналар, спорт ва тўгараклар фаолияти билан танишди. Мактабда ёшларни ватанпарварлик руҳида тарбиялаш, уларнинг билим олиши ва иқтидорини ривожлантириш учун яратилган имкониятлар юқори баҳоланди.
Учрашувлар давомида масъулларга ёшлар билан ишлаш тизимини янада кучайтириш, маҳаллаларда профилактик тадбирларни самарали ташкил этиш ҳамда аҳоли мурожаатларига тезкор ва манзилли ёндашиш бўйича тегишли топшириқлар берилди.
Бугунги кунда профилактика инспекторлари томонидан маҳаллаларда хавфсиз муҳитни таъминлаш, фуқароларнинг ҳуқуқий онги ва маданиятини ошириш, ёшларни турли салбий таъсирлардан асраш борасида кенг кўламли ишлар изчил давом эттирилмоқда.
Транспорт ва туризм объектларида хавфсизликни таъминлаш Департаменти Ахборот гуруҳи