Ички ишлар вазири ўринбосари раҳбарлигидаги ишчи гуруҳнинг Навоий вилоятидаги ўрганишлари Қизилтепа туманида амалга оширилаётган ишлар самарадорлигини кўздан кечириш билан бошланди
2026-05-13 09:00:00 / Янгиликлар
Ўзбекистон Республикаси Ички ишлар вазири ўринбосари — Маънавий-маърифий ишлар ва кадрлар билан таъминлаш департаменти бошлиғи, полковник Диёрбек Саттаров раҳбарлигидаги Вазирлик ишчи гуруҳи Навоий вилоятида бўлиб турибди.
Дастлаб, ишчи гуруҳ Қизилтепа туманида тезкор-профилактик вазият ва жамоат хавфсизлигини таъминлаш борасидаги ишларнинг амалдаги ҳолати билан яқиндан танишди.
Шундан сўнг, туман ИИБ бошлиғининг ҳудуддаги криминоген ҳолат таҳлилига бағишланган тақдимоти тингланди. Фуқаролар мурожаатларини ўрганиш ва йўл-транспорт ҳодисаларининг олдини олишда амалга оширилган ишлар ҳамда натижалар муҳокама этилиб, зарур йўл-йўриқ ва кўрсатмалар берилди.
«Ўзбекистон» маҳалла фуқаролар йиғинида ўрганишлар давом эттирилди. Унда маҳалла еттилиги билан учрашув ўтказилиб, криминоген вазиятни барқарорлаштириш бўйича олиб борилган профилактик ишлар юзасидан суҳбатлашилди.
Маҳалла фаоллари ва нуронийлар билан учрашувда эса оила турмуш доирасидаги муаммоларни ҳал этишда масъуллар билан ҳамкорликни янада кучайтириш лозимлиги таъкидланди.
Шундан сўнг, туманда фаолият юритаётган ишлаб чиқариш корхоналарига ташриф буюрилиб, аҳоли бандлигини таъминлашда кўрилган чора-тадбирлар, ишчилар учун яратилган меҳнат шароитлари, ишлаб чиқариш жараёнлари ҳамда хавфсизлик талабларига риоя этилиши ўрганилди.
Жараёнда мазкур корхоналарда фаолият юритаётган, пробация назоратида турувчи фуқаролар билан ҳам учрашув ўтказилиб, яратилган имкониятлардан оқилона фойдаланиш, жиноят ва ҳуқуқбузарлик йўлига кирмаслик борасида суҳбатлашилди.
Ишчи гуруҳ ўрганишлари вилоятимиз бўйлаб давом этмоқда.
Навоий вилояти ИИБ ахборот хизмати