ИИВ раҳбарияти томонидан Хоразм вилояти транспорт ва туризм объектларида хавфсизликни таъминлаш хизмати ходимларининг хизмат фаолияти кўздан кечирилди
2026-05-13 09:00:00 / Янгиликлар
Хоразм вилоятида транспорт ва туризм объектларида хавфсизликни таъминлаш борасида амалга оширилаётган ишлар юзасидан хизмат фаолияти ўрганилди. Унда Ўзбекистон Республикаси Ички ишлар вазири ўринбосари, генерал-майор Баходир Мирзараҳимов томонидан соҳада хизмат олиб бораётган ходимларнинг кундалик фаолияти кўздан кечирилди.
Ташриф давомида вилоят ҳудудидаги транспорт инфратузилмалари, темир йўл вокзаллари, автотранспорт бекатлари ҳамда туризм объектларида жамоат хавфсизлигини таъминлаш, фуқаролар ва сайёҳлар учун хавфсиз муҳит яратиш борасида амалга оширилаётган чора-тадбирларга алоҳида эътибор қаратилди.
Шунингдек, хизмат олиб бораётган ходимларнинг хизмат интизоми, аҳоли билан мулоқот маданияти, тезкорлик ва профилактик тадбирларни самарали ташкил этиш даражаси таҳлил қилинди.
Генерал-майор Баходир Мирзараҳимов томонидан хизмат самарадорлигини янада ошириш, замонавий ахборот технологияларидан кенг фойдаланиш ҳамда сайёҳлар хавфсизлигини таъминлаш борасида тегишли кўрсатма ва тавсиялар берилди.
Таъкидланганидек, мамлакатимизда туризм соҳасини ривожлантириш, ички ва хорижий сайёҳлар учун қулай ҳамда хавфсиз шароит яратиш давлат сиёсати даражасидаги устувор вазифалардан бири ҳисобланади. Шу боис транспорт ва туризм объектларида хавфсизликни таъминлаш хизмати ходимлари зиммасига юклатилган масъулият янада ортиб бормоқда.
Тадбир якунида хизмат давомида фаоллик кўрсатаётган бир қатор ходимларга миннатдорлик билдирилиб, келгусидаги вазифалар юзасидан аниқ топшириқлар берилди.
ИИВ Транспорт ва туризм объектларида хавфсизликни таъминлаш Департаменти Ахборот гуруҳи