Ички ишлар вазирлиги раҳбарияти томонидан Хоразм вилоятида жамоат хавфсизлигини таъминлаш борасида ўрганиш ишлари олиб борилди
2026-05-12 19:00:00 / Янгиликлар
Ўзбекистон Республикаси Ички ишлар вазирлиги ўринбосари, генерал-майор Баҳодир Мирзараҳимов томонидан Хоразм вилоятида жамоат хавфсизлигини таъминлаш, аҳоли билан ишлаш тизими ҳамда профилактика фаолиятини янада такомиллаштириш мақсадида бир қатор объект ва муассасаларда ўрганиш ишлари олиб борилди.
Жумладан, Янгиариқ тумани Янгиобод маҳалласида, ИТ-Парк биносида жойлашган “Чилонзор тажрибаси” асосида ташкил этилган ШТАБ фаолияти кўздан кечирилди. У ерда аҳоли мурожаатлари билан ишлаш, ҳуқуқбузарликларнинг олдини олиш, ёшлар ва хотин-қизлар билан манзилли ишлаш бўйича амалга оширилаётган ишлар таҳлил қилинди. Шунингдек, рақамли технологиялардан самарали фойдаланиш, профилактика инспекторлари ва секторлар ўртасидаги ҳамкорлик масалалари муҳокама этилди.
Ташриф давомида мутасаддиларга аҳоли муаммоларини ўз вақтида аниқлаш, ҳар бир хонадон билан тизимли ишлаш, жиноятчилик ва ҳуқуқбузарликларни барвақт олдини олиш бўйича аниқ топшириқ ва тавсиялар берилди.
Шунингдек, Боғот туманидаги 1-сон умумтаълим мактабида ҳам бўлиб, таълим муассасасида ўқувчилар хавфсизлигини таъминлаш, ёшлар ўртасида ҳуқуқбузарликларнинг олдини олиш, маънавий-маърифий муҳитни янада мустаҳкамлаш юзасидан амалга оширилаётган ишлар билан танишилди. Мактаб раҳбарияти ва масъул ходимлар билан ўтказилган мулоқотда ёшларни ватанпарварлик руҳида тарбиялаш, уларнинг бўш вақтларини мазмунли ташкил этиш муҳим экани таъкидланди.
Бундан ташқари, ҳудудий ички ишлар органлари ходимларининг кундалик хизмат фаолияти ҳам ўрганилди. Ходимларнинг хизмат интизоми, аҳоли билан муомала маданияти, мурожаатларга муносабат ва профилактик тадбирларни амалга ошириш жараёнлари таҳлил қилиниб, фаолият самарадорлигини ошириш бўйича тегишли кўрсатмалар берилди.
Таъкидланганидек, жойлардаги профилактика ишларини кучайтириш, аҳоли билан яқин мулоқотни таъминлаш ҳамда ҳуқуқбузарликларнинг барвақт олдини олиш ички ишлар органлари фаолиятининг устувор вазифаларидан бири бўлиб қолмоқда.
Транспорт ва туризм объектларида хавфсизликни таъминлаш Департаменти Ахборот гуруҳи