Ўзбекистон Республикаси Ички ишлар вазирлиги

Мамлакатимизда инсон ҳуқуқ ва манфаатларини таъминлаш, халқ билан мулоқот қилиш ҳамда аҳоли муаммоларини бевосита жойларга чиққан ҳолда ўрганиш давлат сиёсатининг устувор йўналишларидан бирига айланган. Ушбу эзгу мақсадлар йўлида жорий йилнинг 10 май куни Бухоро вилояти Ички ишлар бошқармаси биносида Ички ишлар вазири ўринбосари, Маънавий-маърифий ишлар ва кадрлар билан таъминлаш департаменти бошлиғи полковник Диёрбек Саттаров раҳбарлигида фуқаролар учун сайёр қабул ташкил этилди.

Очиқ мулоқот ва самимий руҳида кечган учрашувда 40 дан зиёд фуқароларнинг турли масалалардаги мурожаатлари тингланди. Келиб тушган мурожаатлар доираси хилма-хил бўлиб, улар асосан ички ишлар органлари хизматига ишга қабул қилиш ва ишга тиклаш, дастлабки тергов ҳамда суриштирув жараёнлари, шунингдек, ижтимоий ёрдам кўрсатиш масалаларини ўз ичига олди. Эътиборли жиҳати шундаки, мурожаатчилар орасида тизим фаолиятидан мамнун бўлиб, ўзининг алоҳида миннатдорчилигини билдирган фуқаролар ҳам иштирок этди.

Ҳар бир инсон тақдирига алоҳида эътибор қаратилган мазкур қабул давомида 15 га яқин мурожаат шу жойнинг ўзида ижобий ечимини топди. Қўшимча муддат ва чуқур ўрганишни талаб қилувчи масалалар юзасидан тегишли соҳавий хизмат раҳбарларига аниқ кўрсатмалар берилиб, уларнинг қонуний ва ижобий ҳал этилиши вазирлик ҳамда бошқарма раҳбарияти томонидан қатъий назоратга олинди.

Тадбирнинг аҳамиятли воқеаларидан яна бири ёшлар ҳаёти билан боғлиқ бўлди. Сайёр қабул доирасида фуқаролик паспорти олиш ёшига етган 10 га яқин йигит-қизга илк паспортлар раҳбарият томонидан тантанали равишда топширилди. Бу ҳаётий қадам ёшларнинг қалбида ватанпарварлик туйғуларини янада жўш урдиришига ва жамиятда ўз муносиб ўрнини топишига хизмат қилади.

Бу каби халқчил ташаббуслар ва бевосита мулоқотлар фуқароларнинг давлат идораларига бўлган ишончини мустаҳкамлаш, уларнинг оғирини енгил қилиш ҳамда ҳуқуқ-тартибот идоралари ва халқ ўртасидаги узвий алоқани янги босқичга олиб чиқишда муҳим омил бўлиб хизмат қилади.