ИИВ раҳбарияти томонидан Қоровулбозор тумани, Когон шаҳри ва Когон туманидаги “Навбаҳор”, “Мирзо Улуғбек” ҳамда “Ўзбекистон” маҳаллалари “еттилиги” ҳамда ҳудудий ИИБ ходимларининг кундалик иш фаолиятлари ўрганилди
2026-05-11 22:00:00 / Янгиликлар
Ички ишлар вазирининг ўринбосари полковник Диёрбек Саттаров томонидан Бухоро вилоятидаги бир қатор объектлар ҳамда ҳудудий ички ишлар органлари фаолияти ўрганилди.
Дастлаб Бухоро вилояти Ички ишлар бошқармаси Тиббиёт бўлими госпиталининг Тўдакўл реабилитация бўлинмаси фаолияти билан яқиндан танишилди. Реабилитация марказида яратилган шарт-шароитлар, замонавий тиббий жиҳозлар ва беморлар учун ташкил этилган қулайликлар кўздан кечирилди. Шунингдек, даволаш, тиклаш ва профилактика ишларининг самарадорлиги ҳамда мутахассислар томонидан кўрсатилаётган тиббий хизмат сифати ўрганилди.
Навбатдаги ўрганишлар Қоровулбозор туманида давом эттирилди. “Навбаҳор” маҳалласида маҳалла еттилиги билан ижтимоий профилактика тизими юзасидан суҳбат ўтказилиб, фуқароларнинг ижтимоий-маиший муаммоларини ҳал этиш ва ҳудуд хавфсизлигини таъминлаш бўйича ҳамкорликдаги вазифалар белгилаб берилди. Маҳаллада жиноятчиликнинг олдини олиш борасида амалга оширилган ишлар ижобий баҳоланган бўлса-да, мурожаатлар ҳисоби, ижтимоий профилактика тизими ва айрим электрон базаларни юритишда камчиликлар мавжудлиги кўрсатиб ўтилди.
Шунингдек, Қоровулбозор тумани Ички ишлар бўлими маъмурий биноси кўздан кечирилиб, ходимлар учун яратилган шароитлар ўрганилди. Йўл-транспорт ҳодисаларининг олдини олиш, ҳаракат хавфсизлигини таъминлаш ҳамда хорижий тажрибаларни амалиётга жорий этиш борасидаги ишлар юзасидан тегишли топшириқлар берилди.
Когон шаҳридаги “Мирзо Улуғбек” маҳалласида ҳам маҳалла еттилиги фаолияти ва ижтимоий профилактика тизими муҳокама қилинди. Ҳудуддаги кўп қаватли уйлар атрофини ободонлаштириш, тунги вақтларда автомашиналарни қаровсиз қолдирмаслик ҳамда видеокузатув тизимларини кенгайтириш бўйича масъулларга кўрсатмалар берилди.
Шундан сўнг, Когон шаҳар Ички ишлар бўлими фаолияти ўрганилиб, мурожаатлар билан ишлаш тизимини янада кучайтириш, жиноят аломатлари мавжуд ҳолатларда тезкор-тергов гуруҳларининг зудлик билан воқеа жойига чиқишини таъминлаш бўйича аниқ вазифалар белгиланди. Шу билан бирга, маъмурий бинода ходимларнинг ватанпарварлик руҳини ошириш мақсадида, жадид намояндалари бурчагини ташкил этиш чоралари белгилаб берилди.
Ташриф давомида, Когон туманидаги “Ўзбекистон” маҳалласида ҳам маҳалла еттилиги фаолияти ва ҳудуддаги ижтимоий муҳит ўрганилди. Оғир тоифадаги ёшлар ва низоли оилалар билан ишлаш тизими таҳлил қилиниб, профилактик чора-тадбирларни кучайтириш юзасидан топшириқлар берилди.
Шунингдек, туман Ички ишлар бўлими фаолияти ўрганилиб, тунги хизматни самарали ташкил этиш, профилактика инспекторлари фаолияти устидан назоратни кучайтириш, савдо объектларидаги видеокузатув камераларини қайта хатловдан ўтказиш ҳамда жамоат хавфсизлигини таъминлаш бўйича зарур чора-тадбирлар белгилаб берилди.