Ўзбекистон Республикаси Ички ишлар вазирлиги

Ўзбекистон Республикаси Ички ишлар вазири ўринбосари — Маънавий-маърифий ишлар ва кадрлар билан таъминлаш департаменти бошлиғи, полковник Диёрбек Саттаровнинг Бухоро вилоятига амалий ташрифи доирасида ҳудудда жамоат тартибини сақлаш ҳамда фуқаролар хавфсизлигини кафолатлашга қаратилган қатор муҳим тадбирлар бўлиб ўтди.

Ташриф давомида Бухоро вилояти ИИБ Жамоат хавфсизлиги хизмати Патрул-пост хизмати бошқармасига янги махсус хизмат транспорт воситаларини тантанали равишда топшириш маросими ўтказилди.

Ушбу замонавий техникалар шахсий таркибнинг хизмат давомидаги тезкорлигини ошириш, ҳуқуқбузарликларнинг барвақт олдини олиш ҳамда аҳоли чақирувларига зудлик билан етиб боришини таъминлашда муҳим омил бўлиб хизмат қилади.

Шунингдек, Бухоро шаҳри кўчаларида тунги хизматга жалб қилинган ҳамда маҳаллаларга бириктирилган ҳуқуқни муҳофаза қилувчи органлар ходимлари учун махсус йўриқнома ўтказилди.

Жараёнда давлатимиз раҳбарининг ПҚ-1 ва ПҚ-2 сонли қарорлари ижросини таъминлаш ҳамда жиноятчиликни жиловлашда самара берган “Чилонзор тажрибаси“ асосида ишларни ташкил этиш масалалари чуқур таҳлил қилинди. Ходимларга хавфсиз муҳитни яратиш, ҳудудларни патрул қилиш ва жиноятчилик ўчоқларини бартараф этиш бўйича аниқ механизмлар ва вазифалар тушунтирилди.

Тадбир якунида полковник Диёрбек Саттаров шахсий таркибга юзланиб, бугунги кунда ички ишлар органлари олдида турган энг муҳим вазифаларга тўхталиб, “Халқ осойишталигини таъминлаш — бизнинг энг олий бурчимиздир,“ дея алоҳида таъкидлади.

Ҳар бир ходим ўз хизмат вазифасига виждонан ёндашиши, тун-у кун эл-юрт тинчлиги ва фуқаролар фаровонлиги йўлида садоқат билан хизмат қилиши зарурлиги қайд этилди.

Бухоро вилояти ИИБ Ахборот хизмати