Наманган вилояти ИИБда мурожаатлар билан ишлаш ҳамда «Ҳаракат хавфсизлиги ойлиги» доирасида амалга оширилаётган ишлар муҳокама қилинди
2026-05-08 23:35:00 / Янгиликлар
Жорий йилнинг 20 апрелидан 20 майига қадар вилоят ҳудудида «Ҳаракат хавфсизлиги ойлиги» деб эълон қилиниб, мазкур ойлик доирасида йўл-транспорт ҳодисаларининг олдини олиш ҳамда ҳаракат хавфсизлигини таъминлаш борасида барча соҳавий хизматлар томонидан профилактик тарғибот тадбирлари ва рейдлар олиб борилмоқда.
Жумладан, бугун бошқарма бошлиғи ҳузурида ўтказилган муҳокама йиғилишида ойлик доирасида амалга оширилган ишларнинг 15 кунлик натижалари, шунингдек, жисмоний ва юридик шахслардан келиб тушган мурожаатлар билан ишлаш ҳолати танқидий-таҳлилий руҳда кўриб чиқилди.
Муҳокама давомида йўл қўйилган камчиликлар атрофлича таҳлил қилиниб, келгусида амалга оширилиши лозим бўлган устувор вазифалар белгилаб олинди. Шунингдек, масъул раҳбарлар ҳамда ходимларга ойлик доирасидаги профилактик тадбирларни янада жадаллаштириш, келиб тушган мурожаатлар юзасидан қонунчиликда белгиланган муддатларда қонуний қарорлар қабул қилиш, аҳоли мурожаатларида кўтарилган муаммоларга самарали ва амалий ечим топиш бўйича тегишли кўрсатма ҳамда топшириқлар берилди.
Наманган вилояти ИИБ Ахборот хизмати