Тошкент шаҳар ИИББ раҳбарияти томонидан Миробод туманида ҳуқуқбузарликлар профилактикаси ва хавфсиз муҳит яратиш ишлари танқидий таҳлил қилинди
2026-05-08 16:05:00 / Янгиликлар
Жамоат хавфсизлигини таъминлаш, ҳар бир маҳаллада ҳуқуқбузарликларни барвақт аниқлаш орқали хавфсиз муҳитни яратиш масаласи давлат сиёсатининг устувор йўналиши ҳисобланади.
Бу нафақат ҳуқуқ-тартибот органларининг балки барча даражадаги раҳбарлар ва масъул тизимларнинг бевосита вазифаси ҳамдир.
Бу борада Президентимиз томонидан республикамиз маҳаллаларида хавфсиз муҳитни яратиш, ҳуқуқбузарликларнинг барвақт олдини олиш орқали жиноятчилик ҳамда бошқа қонунбузилишларининг олдини олишга қаратилган қарорининг ижроси пойтахт туманлари кесимида қандай амалга оширилаётгани жараёни тизимли равишда ўрганилиб, таҳлил қилиб борилмоқда.
Шундай ўрганиш ишларининг навбатдагиси Миробод тумани кесимида амалга оширилиб, ўрганишлар давомида аниқланган камчиликлар, уларни бартараф этишга қаратилган танқидий руҳдаги йиғилиш бўлиб ўтди.
Жорий йилнинг 4 ойи давомида амалга оширилган ишлар таҳлили туманда жиноятларнинг олдини олиш ишлари кўпайганлигини кўрсатди. 13 та маҳаллада жиноятлар умуман содир этилмаган, 25 та маҳаллада жиноятлар камайган.
Шунингдек, ижобий ишлар қаторида йўл қўйилган камчиликлар, эътибордан четда қолгани қайд этилиб, оқсоқланаётган соҳалар бўйича маълумотлар тақдим этил ва асосли танқид остига олинди.
Жумладан, маърузачилар туманнинг баъзи маҳалла профилактика инспекторлари томонидан ижтимоий профилактика тадбирларининг манзилли олиб борилмаганлиги, хавф гуруҳлари билан ишлаш самарадорлигининг пастлиги, “маҳалла еттилиги”га бириктириш ишлари талаб даражасида эмаслиги, айрим содир этилган жиноятларнинг муҳокамаси ўтказилмаганлиги ёки юзаки ўтказилганлиги, жиноятларнинг олдини олиш борасидаги тарғибот ишларининг етарли даражада эмаслиги каби бир қанча салбий ҳолатлар таъкидланди.
Йиғилиш якунида қайд этиб ўтилган камчиликларни бартараф этиш, юртбошимизнинг маҳаллаларда хавфсиз муҳитни яратишга қаратилган қарорининг ижросини таъминлаш мақсадида ҳудудларда аниқ чора-тадбирлар белгилаб олинди.
Унда ижро муддатлари қайд этилиб, камчиликларни бартараф этиш юзасидан тегишли соҳа вакиллари ҳамда масъулларга топшириқ ва кўрсатмалар берилди.
Тошкент шаҳар ИИББ Ахборот хизмати