Ўзбекистон Республикаси Ички ишлар вазирлиги

Арнасой тумани ИИБ ЖХХ ҲПБ профилактика катта инспектори, майор Сафарбой Ўралов тумандаги 20-умумтаълим мактаби сари йўл олди. Бугун ушбу таълим масканида вилоят миқёсидаги муҳим семинар бўлиб ўтади.

Унда Жиззах вилоятининг барча туманларида, жумладан, чекка ҳудудлардаги мактабларда фаолият юритаётган хорижлик мутахассислар ва маҳаллий педагоглар тажриба алмашиш учун жам бўлади. Майор жамоат тартибини сақлаш ва семинарнинг осойишта ўтишини таъминлашга масъул этиб бириктирилган.

Семинарда вилоятдаги мактабларда таълим сифатини ошириш, чет тилларни ўқитишни халқаро андозаларга мослаштириш мақсадида жалб этилган 35 нафар хорижлик ўқитувчи иштирок этди.

Улар ўзбекистонлик ҳамкасблари билан тил ўргатишнинг илғор усуллари, замонавий педагогик технологиялар ва сифатли таълим беришнинг инновацион йўллари ҳақида фикр алмашдилар.

Тумандаги 8-мактабда фаолият юритаётган эронлик ўқитувчи Маҳбубе Бахшаеш (Маҳбообеҳ Бакҳшаеш) профилактика катта инспекторига жамоат хавфсизлигини таъминлашдаги хизмати учун алоҳида миннатдорлик билдирди:

Тинчлик — энг улуғ бойлик. Бир неча ойдирки, юртингизда болаларга инглиз тилидан сабоқ бериб келяпман. Ўзбекистондаги осуда ҳаётга ҳавасим келади.

Ватанимдаги яқинларим билан қўнғироқлашганимда, уларга жаннатмонанд юртда эмин-эркин ишлаётганимни айтаман. Шу боис бу улуғ неъматни қадрлаш, унинг посбонларига такрор-такрор раҳмат айтишдан чарчамайман.

Дарҳақиқат, биргина ушбу мактаб жойлашган Ғафур Ғулом номидаги маҳаллада нафақат профилактика инспектори, балки маҳалла еттилиги аъзолари ҳамда жамоатчилик назорати туфайли ҳудуд хавфсизлиги намунали даражада таъминланмоқда.

Ҳудудга 60 га яқин кузатув камералари ўрнатилгани, жамоатчилик гуруҳларининг фаоллиги, туну-кун олиб борилаётган профилактик тадбирлар натижасида маҳаллада йил бошидан буён бирорта ҳам жиноят содир этилишига йўл қўйилмади.

Минг нафардан зиёд ёшларни спорт тўгаракларига қамраб олишда спорт мактабининг айнан шу маҳалла ҳудудида жойлашгани ҳам катта имконият яратмоқда.

©️ “Postda” газетаси, Муқаддас Сапарова, Жиззах вилояти.