Қашқадарё вилояти ИИБда ИИВ ҳузуридаги Тергов департаменти раҳбарияти томонидан “Сурхондарё тажрибаси”ни жорий қилиш бўйича ўқув семинари ташкил этилди
2026-05-07 09:00:00 / Янгиликлар
Жиноят ишлари бўйича процессуал муддатларни белгилаш юзасидан янги амалиётни жорий этишга қаратилган қарор ижросини таъминлаш мақсадида, Ўзбекистон Республикаси Ички ишлар вазирлиги ҳузуридаги Тергов департаменти бошлиғининг биринчи ўринбосари, М.А.Саттаров раҳбарлигида Қашқадарё вилояти ИИБда семинар машғулотлари ўтказилди.
Унда вилоят прокуратураси масъуллари, вилоят ҳамда туман ИИБ соҳавий хизмат раҳбарлари, терговга қадар текширувни амалга оширувчи ходимлар иштирок этди.
Тадбирда ижтимоий хавфи катта бўлмаган жиноят ишларини қисқа муддатларда тамомлашга қаратилган “Сурхондарё тажрибаси”ни жорий этиш масалалари атрофлича муҳокама қилиниб, мазкур амалиётнинг ўзига хос жиҳатлари, терговга қадар текширувни ҳар томонлама тўлиқ ва сифатли ўтказиш, жиноят ишларини тамомлашда “ярашув” ва “айбига иқрорлик тўғрисида келишув” институтларини қўллаш амалиётини янада кенгайтириш бўйича тушунтиришлар берилди.
Семинарда Жиноят-процессуал кодексида кўрсатилган талабларга риоя этиш, жиноят иши доирасида иштирокчиларнинг барча важларини тергов йўли билан текшириш, далилларни қонуний асосда тўплаш ва холисона баҳолаш, процессуал тартибда расмийлаштириш ҳамда бу борада ходимлар малакасини доимий ошириб бориш масалаларига алоҳида эътибор қаратилди.
Ушбу чора-тадбирлар жиноят ишларини самарали, тезкор ва қонун талабларига тўлиқ риоя этган ҳолда тамомлашга, энг асосийси, процесс иштирокчиларининг ортиқча сарф-харажатларига йўл қўймаслик ва оворагарчиликнинг олдини олишга хизмат қилади.
Қашқадарё вилояти ИИБ Ахборот хизмати