Ўзбекистон Республикаси Ички ишлар вазирлиги

9 май – Хотира ва қадрлаш куни арафасида Бухоро вилояти Ички ишлар бошқармаси бошлиғи Иккинчи жаҳон уруши қатнашчиси, истеъфодаги майор Аҳмед Муҳсинов хонадонига ташриф буюриб, отахонни байрам билан табриклади. Қувонарлиси шундаки, қаҳрамонимиз айнан шу кунда ўзининг 102 ёшини тўлдириб, 103 ёшга қадам қўйди.

Истеъфодаги майор Аҳмед Муҳсинов 1924 йил 6 май куни Бухоро туманида таваллуд топган. У 1942 йилнинг сентябрь ойидан бошлаб, 1947 йилнинг март ойигача собиқ иттифоқ армияси сафида хизмат қилган. Хусусан, 1942-1943 йилларда Сталинград шаҳридаги аёвсиз жангларда қатнашган бўлса, кейинчалик Волгоград, Шимолий Корея ва Япония давлатларида бўлиб ўтган жанговар ҳаракатларда ҳам ўз жасоратини кўрсатган.

Урушдан қайтгач, А. Муҳсинов халқ таълими, матбуот ва маданий мерос соҳаларида турли масъулиятли лавозимларда, жумладан, мактаб ўқитувчиси ва музейлар бўлими бошлиғи бўлиб меҳнат қилган. Ички ишлар органларидаги намунали фаолиятини эса 1969 йил 22 апрелдан бошлаган ва 1984 йил 25 августда махсус комендатура бошлиғи лавозимидан майор унвони билан нафақага чиққан.

Отахоннинг давлат ва эл-юрт олдидаги хизматлари юксак қадрланиб, шу кунга қадар юзга яқин орден ва медаллар билан тақдирланган. Улар қаторида 1994 йилда Ўзбекистон Республикаси Президенти номидан берилган «Жасорат» медали ва 2024 йилда топширилган «Ички ишлар органларининг фахрий ходими» кўкрак нишони алоҳида аҳамиятга эга.

Ҳозирги кунда 103 ёшли қаҳрамонимиз Бухоро шаҳрида ўғли Аброр Муҳсинов билан бирга, фарзандлари қарамоғида тинчлик ва хотиржамликда умргузаронлик қилмоқда. Унинг ҳаёт йўли ва оилавий бахти бугунги ёшлар учун чинакам ибрат мактаби бўлиб, айни пайтда отахоннинг 19 нафар невараси, 45 нафар эвараси ва 4 нафар чевараси бор.

Вилоят ИИБ бошлиғининг бу йўқлови нафақат бир инсонга кўрсатилган юксак эҳтиром, балки бутун бир фахрийлар авлодининг тинчлик йўлидаги хизматлари олдидаги чуқур миннатдорлик ифодасидир.

Бухоро вилояти ИИБ Ахборот хизмати