Интерполнинг Ўзбекистондаги Миллий марказий бюросининг хорижий ҳамкорлар билан яқин ҳамкорлиги қидирувдаги шахсни Перу Республикасидан экстрадиция қилиш имконини берди
2026-05-06 08:10:00 / Янгиликлар
Республика ҳуқуқни муҳофаза қилувчи органлари томонидан Интерпол каналлари орқали қидирувга берилган фуқаро Перудан Ўзбекистонга олиб келинди. Интерполнинг Ўзбекистон ва Перу Миллий марказий бюроларининг мувофиқлаштирилган ҳаракатлари, шунингдек, Ўзбекистон Республикаси Бош прокуратураси Халқаро-ҳуқуқий департаменти ҳамда Перу Республикаси Адлия вазирлигининг фаол кўмаги натижасида Ўзбекистон Республикаси Жиноят кодексининг 168-моддаси 4-қисми билан жиноий жавобгарликка тортилиши белгиланган ўта йирик миқдордаги фирибгарликни содир этганлиги учун қидирувда бўлган Туркия Республикаси фуқароси экстрадиция қилинди.
Гумонланувчи Перу Республикаси ҳудудида тергов органларидан яшириниб юрган ва халқаро қидирув доирасида қўлга олинган.
Экстрадиция Тошкент ва Лима Миллий марказий бюролари ходимларининг ҳамкорликдаги тезкор-қидирув тадбирлари ҳамда экстрадиция жараёнида транзит ўтган Франция ва БАА ваколатли органларининг халқаро ҳуқуқ доирасида кўрсатган ёрдами туфайли амалга оширилди.
Мазкур ҳолат трансмиллий жиноятчиликка қарши курашишда Интерпол Халқаро жиноий полиция ташкилотига аъзо давлатлар ўртасидаги икки ва кўп томонлама ҳамкорлик самарадорлигини тасдиқлайди.
Экстрадиция қилинган шахс кейинги процессуал ҳаракатларни ўтказиш ҳамда Ўзбекистон Республикаси қонунчилигига мувофиқ жиноий жавобгарликка тортиш учун Интерпол Миллий марказий бюроси ва Республика Бош прокуратураси ходимлари ҳамроҳлигида Ўзбекистон Республикасига олиб келинди.
Интерполнинг Ўзбекистон Республикасидаги Миллий марказий бюроси