Ички ишлар органлари ходимларининг маънавий-маърифий салоҳияти мустаҳкамланмоқда
2026-05-03 11:05:00 / Янгиликлар
Юртимизда ёш авлодни маънавий баркамол, ватанпарвар ва билимли этиб тарбиялаш давлат сиёсатида устувор йўналишлардан бири ҳисобланади. Шу мақсадда ички ишлар органлари томонидан ёшларни миллий ва маънавий меросимиз билан яқиндан таништиришга қаратилган маърифий тадбирлар изчил амалга оширилмоқда.
Хусусан, ИИВ Маънавий-маърифий ишлар ва кадрлар билан таъминлаш департаменти томонидан тизим ходимлари, соҳавий хизмат вакиллари ҳамда академик лицей ўқувчилари учун мазкур марказга мунтазам ташрифлар ташкил этилмоқда.
Жумладан, ички ишлар органлари ходимлари, академик лицей ўқувчилари ҳамда курсантлар учун Ўзбекистондаги Ислом цивилизацияси марказига ташрифлар йўлга қўйилган. Ушбу марказ юртимизнинг бой тарихи, ислом цивилизацияси тараққиёти ҳамда буюк аждодларимизнинг жаҳон илм-фанига қўшган улкан ҳиссасини ўзида мужассам этган муҳим маънавий маскан ҳисобланади.
Ташриф давомида иштирокчилар марказ экспозициялари билан яқиндан танишиб, ноёб қўлёзмалар, тарихий экспонатлар ва замонавий интерактив кўргазмалар орқали миллий меросимиз ҳақида батафсил маълумотларга эга бўлдилар. Айниқса, Имом ал-Бухорий, Муҳаммад ал-Хоразмий ва Амир Темур каби буюк алломаларнинг ҳаёти ва илмий мероси ёшларда катта қизиқиш уйғотди.
Тадбир доирасида очиқ мулоқотлар ташкил этилиб, ёшларнинг касбий йўналиши, жамиятдаги ўрни ва масъулиятига оид долзарб масалалар муҳокама қилинди. Иштирокчилар ўзларини қизиқтирган саволларга жавоб олдилар ҳамда фикр-мулоҳазаларини эркин билдирдилар.
Шунингдек, ёшларга Президентимиз муаллифлигидаги “Ҳозирги замон ва Янги Ўзбекистон” китоби ҳамда ички ишлар вазири имзоси туширилган табрик-мурожаатномалар тантанали равишда топширилди.
Мазкур эътибор ёшларда юксак руҳий кўтаринкилик уйғотиб, уларнинг билим олишга бўлган интилишини янада оширди. Таъкидлаш жоизки, бундай маънавий-маърифий тадбирлар ёшлар онгида Ватанга садоқат, қонунийлик ва адолат тамойилларига ҳурмат туйғуларини мустаҳкамлашда муҳим аҳамият касб этмоқда.
Эътиборлиси, бугунги кунга қадар ўтказилган тадбирлар доирасида ҳудудий ва таркибий бўлинмалардан 2 минг нафардан ортиқ ички ишлар органлари ходимлари ҳамда ёшлар қамраб олинди. Мазкур йўналишдаги ишлар изчил равишда давом эттирилмоқда.
ИИВ Маънавий-маърифий ишлар ва кадрлар билан таъминлаш департаменти Ахборот хизмати