Қашқадарё вилояти Чироқчи туманида жамоат хавфсизлигини таъминлаш борасида амалий тадбирлар ва таҳлилий йиғилиш ўтказилди
2026-04-30 12:00:00 / Янгиликлар
Чироқчи туманида аҳоли осойишталигини таъминлаш, жиноятчиликнинг барвақт олдини олиш ҳамда ҳудудни рақамлаштириш йўналишида кенг кўламли ишлар амалга оширилди. Мазкур жараёнлар аввал жойларда олиб борилган амалий ҳаракатлар, сўнгра уларнинг натижадорлиги ва самарадорлигини чуқур таҳлил қилишга бағишланган танқидий руҳдаги йиғилиш шаклида ташкил этилди. Асосий эътибор айнан таҳлилий йиғилиш жараёнида аниқланган муаммо ва камчиликларни бартараф этиш масалаларига қаратилди.
Дастлаб тузилган махсус ишчи гуруҳ томонидан туманнинг криминоген вазиятини жиловлаш бўйича бир қатор муҳим чора-тадбирлар амалга оширилди:
Ҳудуддаги барча объектлар, савдо нуқталари, бозорлар ҳамда аҳолининг гавжум жамоат жойлари босқичма-босқич тўлиқ камераллаштирилди. Ўрнатилган замонавий кузатув тизимлари ҳуқуқбузарликларни масофадан аниқлаш, жиноятларнинг олдини олиш ҳамда уларни «иссиқ изидан» фош этишда муҳим самарадорликни таъминламоқда.
Бугунги кунда долзарб бўлиб бораётган кибержиноятчиликнинг олдини олиш мақсадида ишчи гуруҳ томонидан «хонадонбай» тизимида кенг қамровли профилактик тадбирлар ўтказилди. Аҳоли гавжум жойлар ва фуқароларнинг яшаш хонадонларида киберфирибгарлик ҳолатларидан огоҳ этувчи тушунтириш ишлари олиб борилиб, фуқароларнинг ҳуқуқий ҳамда ахборот хавфсизлиги бўйича билимлари оширилди.
Амалга оширилган ушбу амалий ишлар якунида Вилоят ИИБ бошлиғи, полковник Абдувохид Исмоилов ҳузурида туман ИИБ шахсий таркиби иштирокида кенг қамровли таҳлилий йиғилиш ўтказилди. Йиғилишда бажарилган ишлар атрофлича сарҳисоб қилиниб, натижадорлик танқидий нуқтаи назардан таҳлил этилди, мавжуд камчиликлар очиқ муҳокама қилинди.
Фуқаролардан келиб тушаётган мурожаатларни ўз вақтида ва сифатли кўриб чиқиш, ижтимоий профилактика тизимидан самарали фойдаланиш бўйича аниқ топшириқлар берилди. Ходимларнинг хизмат интизоми, кийиниш маданияти ҳамда фуқаролар билан муомала маданиятига алоҳида эътибор қаратилиши лозимлиги таъкидланди.
Шунингдек, жиноятларни эрта аниқлаш ва олдини олишда бошқа ҳуқуқни муҳофаза қилувчи органлар ҳамда кенг жамоатчилик билан ҳамкорликни янада янги босқичга олиб чиқиш зарурлиги уқтирилди.
Йиғилиш якунида берилган топшириқларни ўз вақтида ва сифатли ижро этиш, профилактик тадбирларни янада кучайтириш бўйича аниқ кўрсатмалар берилиб, Чироқчи туманини хавфсиз ҳудудга айлантиришга қаратилган келгуси «йўл харитаси» белгилаб олинди.
Қашқадарё вилояти ИИБ Ахборот хизмати