Ички ишлар вазирлиги раҳбарияти бошчилигида ИИВ Транспорт ва туризм объектларида хавфсизликни таъминлаш департаментида 3 ойлик фаолияти сарҳисоб қилинди
2026-04-28 14:00:00 / Янгиликлар
Ички ишлар вазири ўринбосари, генерал-майор Мирзарахимов Баходир Юлдошевич томонидан ИИВ Транспорт ва туризм объектларида хавфсизликни таъминлаш департаментининг сўнгги уч ойлик фаолиятига бағишланган йиғилиш ўтказилди.
Йиғилиш давомида департамент томонидан амалга оширилган ишлар, эришилган натижалар ҳамда йўл қўйилган камчиликлар атрофлича таҳлил қилинди. Хусусан, аэропортлар, темир йўл вокзаллари ва метро тизимида жамоат хавфсизлигини таъминлаш, ҳуқуқбузарликларнинг олдини олиш, фуқаролар ва хорижий меҳмонлар учун қулай ва хавфсиз муҳит яратиш борасида қатор амалий ишлар бажарилгани таъкидланди.
Шунингдек, транспорт инфратузилмасининг ушбу муҳим бўғинларида замонавий ахборот технологияларини жорий этиш, видеокузатув тизимларини кенгайтириш, профилактик тадбирларни кучайтириш орқали жиноятчиликни барвақт аниқлаш ва бартараф этиш бўйича самарали ишлар олиб борилгани қайд этилди.
Йиғилишда департамент ходимларининг хизмат интизоми, касбий тайёргарлиги ва масъулиятини ошириш масалаларига ҳам алоҳида эътибор қаратилди. Аэропорт, темир йўл ва метро объектларида хизмат олиб бораётган ходимларнинг тезкорлиги ва ҳушёрлигини ошириш устувор вазифа сифатида белгиланди.
Йиғилиш якунида генерал-майор Мирзарахимов Баходир Юлдошевич томонидан келгусида амалга оширилиши лозим бўлган устувор вазифалар белгилаб берилди. Жумладан, транспорт ва туризм соҳаларида, айниқса аэропорт, темир йўл ва метро объектларида хавфсизликни таъминлаш тизимини янада такомиллаштириш, аҳоли ва меҳмонлар учун хавфсиз муҳитни мустаҳкамлаш, ҳуқуқбузарликларнинг олдини олиш бўйича манзилли чора-тадбирларни кучайтириш зарурлиги алоҳида таъкидланди.
Шу билан бирга, масъул раҳбар ва ходимларга йўл қўйилган камчиликларни қисқа муддатларда бартараф этиш, хизмат самарадорлигини ошириш ҳамда қонун устуворлигини таъминлаш юзасидан аниқ топшириқлар берилди.
Мазкур сарҳисоб йиғилиши департамент фаолиятини танқидий-таҳлилий асосда баҳолаш, келгусидаги вазифаларни белгилаш ва соҳада хавфсизликни янада мустаҳкамлашга хизмат қилиши қайд этилди.
ИИВ Транспорт ва туризм объектларида хавфсизликни таъминлаш департаменти Ахборот гуруҳи