Ўзбекистон Республикаси Ички ишлар вазирлиги

Ички ишлар вазирлиги томонидан аҳоли билан очиқ ва самарали мулоқотни йўлга қўйиш ва мурожаатлари билан ишлаш тизими самарадорлигини ошириш мақсадида бир қатор ишлар амалга оширилиб, Вазирлик ҳузуридаги Тергов департаменти томонидан шахсий ва сайёр қабуллар мунтазам равишда ташкил этиб келинмоқда.

Жумладан, 25 апрель куни Вазир ўринбосари Р.Ашропов томонидан навбатдаги шахсий қабул ўтказилиб, аҳолининг мавжуд муаммоларни аниқлаш ҳамда уларни бартараф этиш мақсадида фуқароларнинг мурожаатлари тингланди.

Қабул давомида, жами 145 нафар фуқароларнинг 126 дан ортиқ мурожаатлари ўрганилди. Мурожаатларнинг 89 таси тергов ва суриштирув фаолияти, 6 таси терговга қадар текширув, 1 таси ходимларнинг хатти-ҳаракатлари юзасидан ва 30 таси ички ишлар органларига оид бошқа масалаларни ташкил этади.

Шунингдек, Қорақалпоғистон Республикаси ва вилоятлар аҳолиси учун шахсий қабул онлайн шаклда ҳам ташкил этилиб, онлайн шаклда кечган қабул давомида Жиззах, Хоразм, Сурхондарё ва Қашқадарё вилоятларида истиқомат қилувчи фуқаролардан мурожаатлар келиб тушди.

Шахсий қабул давомида Вазир ўринбосари ҳамда масъул раҳбар ва ходимлар томонидан фуқаролар билан уларни қийнаётган муаммолар юзасидан тўғридан-тўғри мулоқот ўтказилди. Хусусан, терговга қадар текширув, суриштирув ва дастлабки тергов жараёнлари, ҳуқуқбузарликлар профилактикаси ҳамда бошқа йўналишлардаги мурожаатлар қабул қилиниб, уларни қонуний ва тезкор ҳал этиш бўйича масъулларга аниқ кўрсатмалар берилди.

Келиб тушган мурожаатларнинг 34 таси ёки 27 фоизи шу жойнинг ўзида қаноатлантирилди, 20 таси ёки 16 фоизи бўйича фуқароларга тегишли тушунтиришлар берилди. Қолган 72 та мурожаат ёки 57 фоизи қўшимча ўрганиш талаб этганлиги сабабли ижрога йўналтирилиб, ўз вақтида ва холисона кўриб чиқилиши назоратга олинди.

Аҳоли билан бундай очиқ мулоқот ва шахсий қабуллар тизимли равишда давом эттирилмоқда.

Ўзбекистон Республикаси ИИВ ҳузуридаги Тергов департаменти