ИИВ раҳбарияти томонидан Бухоро вилоятида маҳалла кесимида криминоген вазият ўрганилиб, ички ишлар органларининг 3 ойлик фаолияти сарҳисоб қилинди
2026-04-25 20:45:00 / Янгиликлар
Жорий йилнинг 24 апрель куни ИИВ раҳбарияти томонидан Бухоро шаҳридаги «Шайх-ул Олам» маҳалласида жиноятчиликни жиловлаш, криминоген вазиятни барқарорлаштириш ҳамда хавфсиз муҳитни яратиш мақсадида амалий ўрганишлар ўтказилди. Жараёнда «Чилонзор тажрибаси» асосида ҳудудни кичик секторларга бўлиш, ҳар бир хонадон билан индивидуал ишлаш ва манзилли профилактик тадбирларни ташкил этиш масалалари таҳлил қилинди.
Шундан сўнг Бухоро вилояти Ички ишлар бошқармасида йилнинг биринчи чораги якунларига бағишланган кенгайтирилган, танқидий-таҳлилий йиғилиш бўлиб ўтди. Йиғилиш ИИВ вазири ўринбосарлари – полковниклар Диёрбек Саттаров ва Рустам Мирзаев раислигида ўтказилиб, унда вилоят ИИБ раҳбарияти, соҳавий хизматлар ҳамда ҳудудий ички ишлар органлари раҳбарлари иштирок этди.
Йиғилишда ҳудуддаги криминоген вазият, жиноятчиликка қарши курашиш ва ҳуқуқбузарликларнинг олдини олиш борасидаги ишлар танқидий руҳда таҳлил қилинди. Масъул раҳбарларнинг ҳисоботлари тингланиб, мавжуд камчиликлар очиқ муҳокама қилинди. Жиноятларнинг сабабларини аниқлаш ва бартараф этиш, профилактика самарадорлигини ошириш ҳамда ҳудудларда барқарор вазиятни таъминлаш бўйича аниқ вазифалар белгиланди.
Шунингдек, Ўзбекистон Республикаси Президентининг 1-сонли (ПҚ-1) қарорлари ҳамда бошқа норматив-ҳуқуқий ҳужжатлар ижроси кўриб чиқилиб, уларнинг жойларда самарали бажарилишини таъминлаш юзасидан топшириқлар берилди.
Хизмат интизоми ва қонунийликни мустаҳкамлаш масаласига алоҳида эътибор қаратилиб, камчиликларга нисбатан муросасиз ёндашув зарурлиги таъкидланди. Шу билан бирга, хизмат фаолияти давомида жиддий камчиликларга йўл қўйган 17 нафар раҳбарнинг келгусидаги хизмат фаолиятини қайта кўриб чиқиш мақсадида хизмат текшируви тайинлангани маълум қилинди. Чорак якунлари бўйича хизматда юқори натижаларга эришиб, ҳамкасбларига намуна бўлаётган бир гуруҳ ходимлар рағбатлантирилди.
Йиғилиш якунида устувор вазифалар белгиланиб, келгусида хизмат фаолияти самарадорлигини янада яхшилаш бўйича масъулларга аниқ топшириқлар берилди.