ИИВ ҳузуридаги Миграция ва персоналлаштириш департаменти раҳбарияти томонидан Хоразмда миграция ва персоналлаштириш соҳасида манзилли ўрганишлар олиб борилди
2026-04-24 09:00:00 / Янгиликлар
Ўзбекистон Республикаси ИИВ ҳузуридаги Миграция ва персоналлаштириш департаменти бошлиғининг биринчи ўринбосари, полковник Улуғбек Мирзақамбаровнинг Хоразм вилоятига амалга оширган хизмат сафари доирасида миграция ва персоналлаштириш соҳасидаги ишлар ҳолати чуқур ўрганилди.
Хизмат сафари аввало Хоразм вилояти ИИБ ҳузуридаги Миграция ва персоналлаштириш бошқармасидаги шахсий таркиб билан учрашувдан бошланди. Учрашув давомида полковник У.Мирзақамбаров тизимда амалга оширилаётган ислоҳотлар, айниқса, соҳани рақамлаштириш, аҳолига қулайлик яратиш ва хизматлар сифатини ошириш борасидаги устувор вазифаларга алоҳида тўхталиб ўтди.
Жумладан, Ўзбекистон Республикаси Президентининг 2026 йил 19 январдаги “Ички ишлар органларининг миграция ва персоналлаштириш соҳасидаги фаолиятини рақамлаштириш орқали сифат жиҳатидан янги босқичга кўтариш чора-тадбирлари тўғрисида”ги ПҚ-14-сон қарори ижроси доирасида амалга оширилаётган ишлар юзасидан батафсил тушунтиришлар берилди.
Унда, айниқса, электрон хизматлар кўламини кенгайтириш, инсон омилини қисқартириш, фуқаролар учун ортиқча сарсонгарчиликларни бартараф этиш ҳамда шаффофликни таъминлашга қаратилган чора-тадбирлар муҳим аҳамият касб этаётгани таъкидланди.
Шундан сўнг, полковник У.Мирзақамбаров вилоятдаги бир қатор шаҳар ва туманлар Ички ишлар бўлимлари ҳузуридаги Миграция ва персоналлаштириш бўлинмалари фаолиятини жойига чиққан ҳолда ўрганди. Ҳар бир бўлинмада яратилган шарт-шароитлар, ходимлар учун хизмат хоналарининг жиҳозланиши, замонавий ахборот-коммуникация технологиялари билан таъминланганлик даражаси кўздан кечирилди.
Жойларда ўтказилган учрашувларда соҳадаги муаммоларни аниқлаш, уларни манзилли ҳал этиш, ходимларни қийнаётган масалаларни бартараф қилишга алоҳида эътибор қаратилди. Ходимлар билан очиқ мулоқот ўтказилиб, уларнинг фикр-мулоҳазалари ва таклифлари тингланди, амалий ёрдам кўрсатиш бўйича тегишли кўрсатмалар берилди.
Хоразм вилояти ИИБ Ахборот хизмати