Андижон вилояти ИИБ ташаббуси билан таълим муассасалари хавфсизлигини таъминлашга қаратилган “Хавфсиз билим маскани” мавзусида кенг қамровли ўқув-семинари ташкил этилди
2026-04-24 09:00:00 / Янгиликлар
Бугунги кунда жаҳон миқёсида таълим муассасалари хавфсизлигини таъминлаш масаласи энг долзарб вазифалардан бирига айланмоқда. Турли хавф-хатарлар, фавқулодда вазиятлар ва жамоат хавфсизлиги билан боғлиқ таҳдидлар таълим муассасаларида профилактик чораларни янада кучайтиришни талаб этмоқда.
Шу боис, мамлакатимизда ёш авлоднинг хавфсиз муҳитда таълим олиши учун барча зарур шарт-шароитларни яратиш давлат сиёсати даражасидаги устувор вазифалардан бири сифатида белгиланган.
Ана шу мақсаддан келиб чиққан ҳолда, Андижон вилоятида “Хавфсиз билим маскани” мавзусида ўқув-амалий семинар ташкил этилди.
Унда Андижон вилояти ИИБ раҳбарияти, таълим муассасалари раҳбарлари, мактаб директорлари, қўриқлаш хизмати ходимлари ҳамда хавфсизлик учун масъул мутасаддилар иштирок этдилар.
Семинар давомида таълим муассасаларида хавфсиз муҳитни шакллантириш, ўқувчилар ва педагог ходимларнинг ҳаёти ҳамда соғлиғини ишончли муҳофаза қилиш, мавжуд хавфларни барвақт аниқлаш ва уларнинг олдини олишга қаратилган долзарб масалалар муҳокама қилинди.
Хусусан, мактабларда кириш-чиқиш назоратини янада кучайтириш, замонавий видеокузатув ва сигнализация тизимларини жорий этиш, қўриқлаш хизмати фаолияти самарадорлигини ошириш, шунингдек фавқулодда вазиятларда тезкор ва мувофиқлаштирилган ҳаракат қилиш механизмларини ишлаб чиқиш юзасидан аниқ таклиф ва тавсиялар билдирилди.
Таъкидланганидек, таълим муассасалари хавфсизлиги — бу фақатгина қўриқлаш масаласи эмас, балки ўқувчиларнинг эртанги келажаги, уларнинг хотиржам таълим олиши ва ота-оналар ишончини таъминлаш билан бевосита боғлиқ муҳим вазифадир.
Семинар доирасида таълим муассасаларида фаолият олиб бораётган қоровуллар учун ташкил этилган махсус ўқув курслари ҳақида ҳам атрофлича маълумот берилди. Мазкур курсларда ички ишлар органлари, фавқулодда вазиятлар хизмати, соғлиқни сақлаш ва таълим соҳаси мутахассислари ҳамкорлигида назарий ва амалий машғулотлар ўтказилмоқда.
Амалий машғулотлар жараёнида шартли фавқулодда ҳолатлар моделлаштирилиб, иштирокчиларнинг экстремал вазиятларда тўғри қарор қабул қилиш, биринчи тиббий ёрдам кўрсатиш, эвакуация жараёнларини ташкил этиш, шунингдек мактаб ҳудудида жамоат тартиби ва йўл ҳаракати хавфсизлигини таъминлаш борасидаги кўникмалари синовдан ўтказилди.
Тадбир якунида масъулларга таълим муассасаларида хавфсизлик тизимини янада мустаҳкамлаш, профилактик ишлар самарадорлигини ошириш ҳамда ҳар қандай хавф ва таҳдидларнинг олдини олиш бўйича тегишли вазифалар белгилаб берилди.
“Хавфсиз билим маскани” ўқув-амалий семинари ёш авлоднинг хавфсиз ва осойишта муҳитда таълим олишини таъминлаш, таълим муассасаларида замонавий хавфсизлик тизимини шакллантириш ҳамда жамоат хавфсизлигини мустаҳкамлаш йўлидаги муҳим амалий қадамлардан бири бўлди.
Андижон вилояти ИИБ Ахборот хизмати