Самарқанд шаҳрида ўтказилаётган глобал форум доирасида Ўзбекистон ва АҚШ ўртасида трансмиллий наркотаҳдидларга қарши кураш ва халқаро ҳамкорликни кучайтириш масалалари юзасидан учрашув бўлиб ўтди
2026-04-21 17:30:00 / Янгиликлар
Самарқанд шаҳрида ўтказилаётган “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги глобал форум доирасида Ўзбекистон Республикаси Ички ишлар вазири генерал-лейтенант Азиз Ташпулатов ҳамда АҚШ Давлат департаменти ҳузуридаги Халқаро наркотиклар ва ҳуқуқни муҳофаза қилиш бюроси Европа ва Осиё дастурлари офиси (INL/EA) директори Марк Тервакоски ўртасида учрашув бўлиб ўтди.
Дўстона ва конструктив руҳда ўтган учрашувда томонлар бугунги кунда глобал тус олаётган наркотаҳдидлар нафақат алоҳида давлатлар, балки бутун минтақа барқарорлигига жиддий таъсир кўрсатаётганини таъкидлаб ўтдилар. Шу нуқтаи назардан, улар ўзаро ҳамкорликни янги босқичга олиб чиқиш ва халқаро тажриба алмашинувини жадаллаштириш масалаларига алоҳида урғу бердилар.
Тадбирда томонлар минтақавий ҳамкорлик изчил ривожланаётганини қайд этиб, замонавий таҳдидларга қарши самарали курашиш фақатгина миллий даражада эмас, балки халқаро шериклик асосида амалга оширилганда юқори натижа бериши, шу боисдан келгусида ҳуқуқни муҳофаза қилувчи органлар учун замонавий ўқув дастурларини ишлаб чиқиш, техник жиҳозлашни яхшилаш ва бошқа бир қатор янги ташаббусларни амалга ошириш масалаларини муҳокама қилдилар.
Музокаралар якунида кўриб чиқилган масалаларнинг аҳамияти ва долзарблиги алоҳида қайд этилди. Таъкидланганидек, мазкур учрашув глобал форум доирасидаги мазмунли ва амалий мулоқотлардан бири бўлиб, унда илгари сурилган фикр ва ташаббуслар умумий саъй-ҳаракатларнинг устувор йўналишларини белгилашда муҳим аҳамият касб этади.