Самарқандда ўтказилаётган глобал форум доирасида Ўзбекистон Ички ишлар вазирлиги ва БМТнинг Гиёҳванд моддалар ва жиноятчилик бўйича бошқармаси (UNODC) ўртасидаги ҳамкорлик масалалари муҳокама қилинди
2026-04-21 16:30:00 / Янгиликлар
Самарқанд шаҳрида “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги глобал форуми доирасида Ўзбекистон Республикаси Ички ишлар вазири генерал-лейтенант Азиз Ташпулатовнинг БМТнинг Гиёҳванд моддалар ва жиноятчилик бўйича бошқармаси (UNODC) Ижрочи директорининг ўринбосари жаноб Бо Матиасен билан расмий учрашуви бўлиб ўтди.
Тадбир давомида томонлар ҳуқуқни муҳофаза қилиш соҳасидаги ҳамкорликни янада ривожлантириш, гиёҳванд моддаларнинг ноқонуний айланмасига қарши курашиш, трансмиллий уюшган жиноятчиликка қарши самарали чораларни кучайтириш ҳамда бу борада халқаро тажриба алмашинувини такомиллаштириш масалаларини муҳокама қилдилар.
Бо Матиасен БМТ гиёҳванд моддалар ва жиноятчилик бўйича бошқармаси томонидан амалга оширилаётган халқаро ташаббуслар ҳақида маълумот бериб, Ўзбекистон билан ҳамкорликни янада мустаҳкамлашга тайёр эканини билдирди. У, шунингдек, минтақавий хавфсизликни таъминлаш ва наркожиноятларнинг олдини олиш борасидаги ҳамкорликдаги лойиҳаларнинг аҳамиятини таъкидлади.
Ўз навбатида Ички ишлар вазири мамлакатимизда ҳуқуқбузарликларнинг олдини олиш ва жиноятчиликка қарши курашиш бўйича амалга оширилаётган ислоҳотлар ҳақида сўз юритиб, халқаро ташкилотлар билан ҳамкорликни янада кенгайтириш муҳимлигини қайд этди.
Конструктив ва дўстона руҳда ўтган учрашув якунида икки томон ҳам ўзаро манфаатли ҳамкорликни давом эттириш ва янги қўшма ташаббусларни амалга оширишга келишиб олдилар.