Самарқанд форуми доирасида хорижий делегациялар иштирокида хавфсизлик тизимини такомиллаштириш ва амалий ҳамкорликни кенгайтириш чора-тадбирлари амалга оширилмоқда
2026-04-19 13:00:00 / Янгиликлар
Самарқанд шаҳрида “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги глобал форум доирасида қатор амалий тадбирлар ташкил этилди.
Мазкур нуфузли форумда иштирок этиш учун мамлакатимизга ташриф буюрган хорижий полиция тузилмалари делегациялари ички ишлар органлари фаолияти ҳамда йирик тадбирларда хавфсизликни таъминлаш ва мувофиқлаштириш ишлари билан яқиндан танишдилар.
Тадбир давомида Озарбайжон, Туркия, Белоруссия, Қозоғистон, Афғонистон, Финляндия, Австрия, Франция ички ишлар вазирликлари вакиллари Самарқанд вилояти Ички ишлар бошқармасининг Ситуацион маркази фаолияти билан танишиб, унинг замонавий бошқарув ва назорат имкониятларига алоҳида эътибор қаратдилар.
Шу билан бирга, меҳмонларга ички ишлар органларининг кундалик фаолиятида қўлланилаётган махсус техника, қурол-аслаҳа ҳамда турли хизмат воситалари намойиш этилди.
Бундан ташқари, хорижий ҳамкорлар учун Самарқанд шаҳри ва унинг ҳудудида жойлашган йирик туристик объектларда хавфсизликни таъминлаш бўйича амалга оширилаётган ишлар юзасидан махсус тақдимотлар ўтказилди. Уларда жамоат тартибини сақлаш, туристлар хавфсизлигини таъминлаш ва фавқулодда ҳолатларнинг олдини олишга қаратилган чора-тадбирлар батафсил ёритилди.
Жараёнда меҳмонлар мамлакатимизда жамоат хавфсизлигини таъминлаш борасида амалга оширилаётган ишларга юқори баҳо бериб, илғор тажрибани эътироф этдилар.
Шунингдек, келгусида ўзаро ҳамкорликни янада мустаҳкамлаш ва тажриба алмашинувини изчил йўлга қўйиш бўйича келишувларга эришилди.