Қашқадарё вилоятида ҳуқуқни муҳофаза қилувчи органлар раҳбарлари иштирокида тергов сифатини оширишга бағишланган семинар ўтказилди
2026-04-19 10:35:00 / Янгиликлар
Мамлакатимизда қонун устуворлигини таъминлаш, фуқароларнинг ҳуқуқ ва эркинликларини ишончли ҳимоя қилиш ҳамда одил судловни амалга оширишда тергов жараёнининг сифати алоҳида аҳамият касб этади.
Бу борада ҳуқуқни муҳофаза қилувчи органлар ўртасидаги ҳамкорликни мустаҳкамлаш, амалиётда учраётган муаммоларни бартараф этиш ва илғор тажрибаларни жорий этиш устувор вазифалардан бири.
Шу мақсадда, Қашқадарё вилояти прокурори Б.Сайипов, вилоят ИИБ бошлиғи Абдувоҳид Исмоилов ҳамда вилоят суди раиси Анвар Элмуродов бошчилигида ўтказилган семинар «Тергов сифатини ошириш» юзасидан ташкил этилди.
Унда ҳудудий ҳуқуқни муҳофаза қилувчи органлар ходимлари, терговчилар ва суд-ҳуқуқ тизими вакиллари иштирок этди.
Тадбир давомида жиноят ишларини тергов қилишда қонун устуворлигини таъминлаш, далилларни тўғри ва қонуний йиғиш, процессуал хатоларнинг олдини олиш масалалари атрофлича муҳокама қилинди.
Шунингдек, тергов жараёнида замонавий ахборот технологияларидан самарали фойдаланиш, фуқароларнинг ҳуқуқ ва манфаатларини ишончли ҳимоя қилиш ҳамда ишларни судга қадар пухта тайёрлаш юзасидан амалий тавсиялар берилди.
Семинар якунида масъулларга тергов сифатини янада ошириш, жиноятларни барвақт аниқлаш ва адолатли қарорлар қабул қилинишига эришиш бўйича аниқ вазифалар юклатилди.
Бу каби семинарларни мунтазам равишда ташкиллаштириш белгилаб олинди.
Қашқадарё вилояти ИИБ Ахборот хизмати