Сирдарё вилояти ИИБ раҳбарияти томонидан маҳаллада ижтимоий-маънавий муҳитни яхшилаш ва жиноятчиликнинг олдини олишга қаратилган амалий ташриф амалга оширилди
2026-04-19 10:30:00 / Янгиликлар
Сирдарё вилояти Ички ишлар бошқармаси бошлиғи томонидан Гулистон шаҳрида жойлашган “Обод юрт” маҳалласига амалий ташриф амалга оширилди.
Ушбу ташрифдан кўзланган асосий мақсад маҳалладаги ижтимоий-маънавий муҳитни янада яхшилаш, жиноятчиликнинг олдини олиш ҳамда аҳоли билан яқиндан мулоқот ўрнатишдан иборат бўлди.
Ташриф давомида маҳалланинг криминоген вазияти атрофлича ўрганилиб, ҳуқуқбузарликлар келиб чиқишига сабаб бўлаётган омиллар таҳлил қилинди.
Шунингдек, профилактика инспекторлари ва масъул ташкилотлар томонидан олиб борилаётган ишлар самарадорлигига алоҳида эътибор қаратилди.
ИИБ бошлиғи маҳаллада истиқомат қилаётган якка ёлғиз фуқаролар ҳолидан хабар олиб, уларнинг турмуш шароити, соғлиги ва кундалик эҳтиёжлари билан қизиқди.
Уларни қийнаётган муаммоларни жойида ўрганиб, мутасадди ташкилотларга тегишли топшириқлар берилди.
Ташриф доирасида маҳаллада жойлашган умумий ётоқхонага ҳам борилди. У ерда истиқомат қилаётган алоҳида тоифадаги ёшлар билан очиқ мулоқот ўтказилиб, уларнинг ҳаёт тарзи, муаммолари ва келгусидаги режалари тингланди.
Ёшлар ўртасида ҳуқуқбузарликларнинг олдини олиш, соғлом турмуш тарзини шакллантириш ва уларни жамиятга мослаштириш масалалари юзасидан профилактик суҳбатлар олиб борилди.
Шунингдек, ётоқхонада яшовчи фуқароларнинг яшаш шароитлари ҳам атрофлича кўздан кечирилиб, коммунал хизматлар, санитария ҳолати ва бошқа ижтимоий масалалар ўрганилди.
Аҳолини қийнаб келаётган муаммоларни бартараф этиш юзасидан тегишли ташкилотларга аниқ вазифалар юклатилди.
Мазкур ташриф маҳаллада ижтимоий барқарорликни таъминлаш, аҳоли муаммоларини ўз вақтида ҳал этиш ва ҳуқуқбузарликларнинг олдини олиш борасида муҳим аҳамият касб этди.
Сирдарё вилояти ИИБ Ахборот хизмати