Ўзбекистон Республикаси Ички ишлар вазири ва Қозоғистон Республикасининг Ўзбекистондаги Фавқулодда ва Мухтор элчиси ўртасида учрашув бўлиб ўтди
2024-07-03 18:40:00 / Янгиликлар
Учрашув ўзаро ҳурмат ва конструктив мулоқот муҳитида бўлиб ўтди ва икки давлат ўртасидаги ишонч ва ҳамкорликнинг юксак даражасини яна бир бор тасдиқлади.
Суҳбат чоғида томонлар ҳуқуқни муҳофаза қилиш соҳасидаги икки тарафлама ҳамкорликни мустаҳкамлашга доир кенг кўламли масалаларни муҳокама қилиб ўтдилар. Вазир Ўзбекистон ва Қозоғистон ҳуқуқ-тартибот идораларининг ўзаро ҳамкорлиги стратегик хусусиятга эга бўлиб, минтақада барқарорлик ва хавфсизликни таъминлашнинг гарови эканини таъкидлади.
Элчи Қозоғистон ва Ўзбекистон ўртасида тарихий ришталарга асосланган анъанавий дўстлик ва қардошлик муносабатлари сақланиб келаётганини таъкидлаб, трансмиллий жиноятчилик, терроризм ва экстремизмга қарши курашда ҳамкорликни янада ривожлантириш муҳимлиги ҳақида фикрларини баён этди.
Томонлар қўшма лойиҳа ва ташаббусларни самарали амалга ошириш мамлакатларимизда ҳуқуқ-тартибот ва хавфсизликни мустаҳкамлашга хизмат қилишига ишонч билдирди.
Вазир элчига икки томонлама муносабатларни ривожлантиришга кўрсатаётган фаол кўмаги учун миннатдорлик билдириб, Ўзбекистон Қозоғистон билан ҳамкорликни янада кенгайтиришга тайёрлигини таъкидлади. Ўз навбатида, элчи ўзбекистонлик ҳамкасбларнинг юқори даражадаги профессионаллиги ва фаолиятларининг шаффофлиги муваффақиятли ҳамкорлик қилиш учун қулай шарт-шароит яратаётганини қайд этди.
Мазкур учрашув Ўзбекистон ва Қозоғистон республикалари ўртасидаги ўзаро ҳурмат ва умумий мақсадларга – минтақада тинчлик, барқарорлик ва фаровонликни таъминлашга асосланган муваффақиятли ва самарали ҳамкорликнинг ёрқин намунасидир.
Ўзбекистон Республикаси ИИВ