“Ички ишлар вазири кубоги” футбол мусобақасида Қашқадарё вилояти ИИБ жамоаси пеналтилар сериясида ғалаба қозониб, бош совринга эга бўлди
2026-03-01 00:00:00 / Янгиликлар
Давлатимиз раҳбари томонидан спортни янада ривожлантириш, аҳоли, шу жумладан давлат идоралари ходимлари ўртасида соғлом турмуш тарзини кенг тарғиб этиш бўйича муҳим вазифалар белгилаб берилган. Унга кўра, вазирлик ва идораларда камида 4 та спорт тури бўйича йилига икки марта спорт мусобақаларини мунтазам равишда ташкил этиш ҳамда ғолиб ва фаол иштирокчиларни муносиб тақдирлаш тизими йўлга қўйилган.
Ички ишлар органлари ходимлари ўртасида ҳам соғлом турмуш тарзини кенг тарғиб этиш, жамоавий ҳаракатланиш кўникмаларини янада ривожлантириш ва ўзаро соғлом рақобатни шакллантириш мақсадида жорий йилнинг 1-апрелидан 15-апрел санасига қадар футбол бўйича “Ички ишлар вазири” кубоги мусобақаси ўтказилди.
Мамлакатимиздаги барча ҳудудий ички ишлар органлари жамоалари иштирокида ўтказилган мусобақанинг финал баҳсида Тошкент шаҳар ИИББ жамоаси Қашқадарё вилояти ИИБ вакилларига қарши саф тортди.
ЖАР стадионида бўлиб ўтган финал оқшомида, ўйин бошидан номинал мезбонлар тезкор ҳужумлар билан рақиб жарима майдони атрофида хавфли вазиятларни юзага келтирган бўлса, Қашқадарё вилояти жамоаси қарши ҳужумлар билан жавоб қайтарди. Икки бўлимда ҳам Тошкент шаҳар ички ишлар бош бошқармаси вакиллари кўплаб имкониятларга эга бўлди, бироқ ўйиннинг асосий вақтида дарвозалар дахлсизлиги сақлаб қолинди.
Шу тариқа чемпион номи пеналтилар сериясида аниқланди. Серияда 4:2 ҳисобида ғалаба қозонган Қашқадарё вилояти ИИБ жамоаси футбол бўйича “Ички ишлар вазири кубоги” соҳибига айланди.
Тақдирлаш маросимида иштирок этган ИИВ раҳбарияти ва Ўзбекистон Футбол Ассоциацияси вакиллари томонидан учинчи ўринни қўлга киритган Андижон вилояти ИИБ жамоасига бронза медаллар ҳамда 40 миллион сўм мукофоти, иккинчи ўринни эгаллаган Тошкент шаҳар ИИББ жамоасига кумуш медаллар ва 50 миллион сўм мукофоти топширилди. Чемпионлар, Қашқадарё вилояти вакиллари эса олтин медаллар, 60 миллион сўм миқдорида мукофот ва мусобақа кубогини қабул қилиб олдилар.
Шу тариқа чинакам спорт байрамига айланиб кетган мусобақа кўтаринки руҳда якунига етди.