ИИВ раҳбарияти томонидан Тошкент вилоятида ички ишлар органларининг жанговар шайлик ва жисмоний тайёргарлик текширувлари якунлари юзасидан йиғилиш ўтказилди
2026-04-15 16:50:00 / Янгиликлар
Тошкент вилоятида ички ишлар органлари ходимларининг жанговар ва жисмоний тайёргарлик даражасини баҳолашга қаратилган текширувлар якунланди. Ушбу текширувлар натижаларига бағишланган йиғилиш Ички ишлар вазирининг ўринбосари, генерал-майор Баходир Мирзарахимов раҳбарлигида ўтказилди.
Йиғилишда текширувлар давомида аниқланган натижалар, ходимларнинг жисмоний тайёргарлик даражаси, хизмат фаолиятидаги жанговар тайёргарлик кўникмалари ҳамда мавжуд камчиликлар атрофлича муҳокама қилинди. Таъкидланганидек, замонавий талаблар асосида ҳар бир ходим юқори даражадаги жисмоний ва руҳий тайёргарликка эга бўлиши, фавқулодда вазиятларда тезкор ва самарали ҳаракат қила олиши зарур.
Генерал-майор Баходир Мирзарахимов ўз сўзида ички ишлар органлари ходимларининг жанговар шайлиги ва жисмоний тайёргарлигини мунтазам равишда ошириб бориш муҳимлигини алоҳида таъкидлади. Шунингдек, у камчиликлар аниқланган йўналишларда аниқ чора-тадбирлар ишлаб чиқиш, машғулотларни янада самарали ташкил этиш ва назоратни кучайтириш бўйича тегишли топшириқлар берди.
Йиғилиш якунида келгусида бу каби текширувларни тизимли равишда давом эттириш, ходимларнинг жанговар ва жисмоний тайёргарлигини янада мустаҳкамлаш ҳамда хизмат самарадорлигини оширишга қаратилган вазифалар белгилаб олинди.
Транспорт ва туризм объектларида хавфсизликни таъминлаш Департаменти Ахборот гуруҳи