ИИВ раҳбарияти томонидан Тошкент шаҳри Миробод туманида жойлашган “Биродарлик”, “Темир йўлчилар” ҳамда “Тонг юлдузи” маҳаллаларида хавфсиз муҳит яратиш бўйича амалий ишлар ўрганилди
2026-04-14 18:50:00 / Янгиликлар
Тошкент шаҳрида хавфсиз муҳит яратиш бўйича амалий ишлар изчил давом этмоқда. Хусусан, ички ишлар вазири ўринбосари генерал-майор Мирзарахимов Баходир Юлдошевич томонидан Миробод туманида жойлашган “Биродарлик”, “Темир йўлчилар” ҳамда “Тонг юлдузи” маҳаллаларида олиб борилаётган ишлар ўрганилди.
Ўрганишлар давомида аҳоли хавфсизлигини таъминлаш, жиноятчиликнинг олдини олиш ҳамда ҳуқуқбузарликларни барвақт аниқлашга қаратилган чора-тадбирларга алоҳида эътибор қаратилди. Шунингдек, маҳаллалардаги бозорлар, ер ости йўлаклари ва аҳоли гавжум жойлардаги ҳолатлар таҳлил қилиниб, уларда хавфсизликни таъминлаш бўйича мавжуд камчиликлар кўриб чиқилди.
Мазкур ҳудудларда видеокузатув тизимларини кенгайтириш, ёритиш мосламаларини яхшилаш, профилактика инспекторлари фаолиятини кучайтириш юзасидан тегишли топшириқлар берилди. Ер ости йўлларида санитар ҳолат, ёритиш ва хавфсизлик талабларига риоя этилиши юзасидан ҳам амалий чоралар белгиланди.
Шу билан бирга, “маҳалла еттилиги” — яъни маҳалла раиси, профилактика инспектори, ёшлар етакчиси, хотин-қизлар фаоли, нуронийлар ва бошқа мутасаддилар ҳамкорлигида ишлар самарадорлигини ошириш масалалари муҳокама қилинди. Уларнинг аҳоли билан яқин мулоқотда бўлиб, муаммоларни жойида ҳал этиши муҳим экани таъкидланди.
Ташриф якунида масъулларга ҳар бир маҳаллада хавфсиз муҳитни таъминлаш, фуқаролар тинчлиги ва осойишталигини мустаҳкамлаш бўйича аниқ вазифалар юклатилди.
Транспорт ва туризм объектларида хавфсизликни таъминлаш Департаменти Ахборот гуруҳи