Ўзбекистон Республикаси Ички ишлар вазирлиги

Ички ишлар вазири ўринбосари генерал-майор Баходир Мирзарахимов томонидан Хоразм вилояти Хива шаҳри Газчи маҳалла фуқаролар йиғинида ўрганишлар олиб борилди

Хоразм вилояти Хива шаҳрида жойлашган Газчи маҳалла фуқаролар йиғинида Ички ишлар вазири ўринбосари раҳбарлигида ўрганиш ишлари амалга оширилди. Унда маҳалладаги ижтимоий-иқтисодий ҳолат, жиноятчиликнинг олдини олиш, аҳоли бандлигини таъминлаш ва ёшлар билан ишлаш масалалари атрофлича таҳлил қилинди.

Ўрганишлар жараёнида маҳалла “еттилиги” — маҳалла раиси, ҳоким ёрдамчиси, профилактика инспектори, ёшлар етакчиси, хотин-қизлар фаоли, солиқ инспектори ҳамда ижтимоий ходим иштирок этди. Улар томонидан ҳар бир йўналиш бўйича амалга оширилаётган ишлар юзасидан ахборот берилди.

Хусусан, профилактика инспектори томонидан ҳуқуқбузарликларнинг олдини олиш, жиноятчиликни барвақт бартараф этиш бўйича кўрилаётган чоралар ҳақида маълумот тақдим этилди. Ёшлар етакчиси эса ёшларнинг бўш вақтини мазмунли ташкил этиш, уларни тадбиркорлик ва касб-ҳунарга жалб қилиш борасида амалга оширилаётган ишларга тўхталиб ўтди.

Хотин-қизлар фаоли томонидан оилаларда ижтимоий-маънавий муҳитни яхшилаш, хотин-қизларни қўллаб-қувватлаш, уларнинг бандлигини таъминлаш масалалари муҳокама қилинди. Шунингдек, ҳоким ёрдамчиси ва солиқ инспектори аҳолини тадбиркорликка жалб қилиш, янги иш ўринлари яратиш ва даромад манбаларини кенгайтириш юзасидан амалга оширилаётган ишлар ҳақида ахборот берди.

Ўрганишлар якунида мавжуд муаммолар юзасидан аниқ таклиф ва тавсиялар ишлаб чиқилди. Масъулларга белгиланган вазифалар юклатилиб, уларнинг ижросини таъминлаш бўйича муддатлар белгилаб берилди.

Мазкур ўрганишлар маҳаллада тинчлик ва осойишталикни таъминлаш, аҳоли фаровонлигини ошириш ҳамда “обод ва хавфсиз маҳалла” тамойилини тўлиқ рўёбга чиқаришга хизмат қилиши таъкидланди.

Транспорт ва туризм объектларида хавфсизликни таъминлаш Департаменти Ахборот гуруҳи